म्हापसा: लुथरा बंधू व त्यांच्या सहभागीदाराने आर्थिक फायद्यांसाठी क्लबच्या सुरक्षेशी तडजोड केली. लुथरा बंधू हे क्लबमधील उत्पन्नांचे थेट आर्थिकदृष्ट्या लाभार्थी होते. त्यामुळे आम्ही विविध व्यवस्थापकांची नियुक्ती केली होती, असे सांगून ते नैतिकता झटकू शकत नाहीत. क्लबमधीलच स्टाफ व काही प्रत्यक्षदर्शींचे हणजूण पोलिसांनी जबाब नोंदविले आहेत.

त्यांच्यानुसार, दुर्घटनेच्या दिवशी क्लबस्थळी अग्निशमन उपकरणे किंवा फायर अलार्म वाजले नव्हते. त्यामुळे लुथरांकडून जे दावे केले जाताहेत की, त्यांनी क्लबमध्ये आपत्कालिन यंत्रणा बसविली होती, यात शाशंकता दिसते, असा युक्तिवाद सरकारी पक्षाने (फिर्यादी) मंगळवारी केला. ६ डिसेंबर २०२५ रोजी, लुथरांनी ट्रव्हल एजेंटशी संपर्क साधून विमानाचा दर किती आहे, अशी विचारणा केली होती. त्यांचा तिकिट बूक करण्याचा इरादा नव्हता.

कालांतराने, बर्च दुर्घटना रात्री ११.३०च्या आसपास घडली. त्यानंतर, लुथरांनी आपले मोबाईल ‘स्वीच ऑफ’ केले व ७ रोजी पहाटे १.१३च्या आसपास सौरभ लुथराने पत्नीच्या मोबाईलवरुन एजेंटशी संपर्क साधून, तिकिट बूक करण्यास सांगितले. त्यानुसार १.१७ वा. फुकेत-थायलंडसाठी तिकिट बूक करण्यात आली व पहाटे ५.२०वा. लुथरा फुकेतसाठी रवाना झाले. होते.

पुढील दिशा

सरकारी पक्षाने या मुद्द्यांच्या आधारे लुथरा बंधूंना जामीन देण्यास कडाडून विरोध केला आहे. जर त्यांना जामीन मिळाला, तर ते पुराव्यांशी छेडछाड करू शकतात किंवा पुन्हा देशाबाहेर पळून जाण्याची शक्यता आहे, अशी भीती व्यक्त करण्यात आली आहे. आता या सर्व मुद्द्यांचा विचार करून न्यायालय (Court) ५ फेब्रुवारी रोजी आपला अंतिम निकाल देणार आहे.