म्हापसा: हडफडे येथील नाईटक्लबला लागलेल्या आणि २५ जणांचा बळी घेणाऱ्या भीषण आग प्रकरणातील मुख्य संशयित, ‘बर्च बाय रोमियो लेन’चे मालक सौरभ लुथरा, गौरव लुथरा आणि त्यांचे व्यावसायिक भागीदार अजय गुप्ता यांनी काल सोमवारी, सकाळच्या सत्रात (ता. १४) म्हापसा अतिरिक्त जिल्हा व सत्र न्यायालयासमोर आत्मसमर्पण केले.

मुंबई उच्च न्यायालयाच्या गोवा खंडपीठाने त्यांचा जामीन रद्द केल्यानंतर संशयितांनी सर्वोच्च न्यायालयात धाव घेतली होती; मात्र सर्वोच्च न्यायालयाने त्यांचे अपील फेटाळून लावल्याने त्यांना अखेर न्यायालयापुढे हजर व्हावे लागले. आत्मसमर्पणानंतर न्यायालयाने तिघांनाही न्यायालयीन कोठडी सुनावत कोलवाळ येथील मध्यवर्ती कारागृहात रवानगी केली आहे.

सुनावणीदरम्यान आरोपींच्या वकिलांनी त्यांच्या वैद्यकीय स्थितीचा दाखला देत औषधे, गादी आणि टॉवेल पुरवण्याची मागणी न्यायालयाकडे केली. डॉक्टरांच्या प्रिस्क्रिप्शनची दखल घेत सत्र न्यायालयाने या मागण्या मान्य केल्या; मात्र गौरव आणि सौरभ लुथरा यांच्यासाठी शूज देण्याची मागणी तूर्तास राखून ठेवत यावर तपास अधिकाऱ्याचा अहवाल मागवला आहे. ॲड. सौम्या ड्रागो यांनी सांगितले की, सर्वोच्च न्यायालयाच्या निर्देशानुसार लुथरा यांनी आत्मसमर्पण केले असून त्यांच्या वैद्यकीय गरजा न्यायालयाने मान्य केल्या आहेत.