पणजी : तृणमूल काँग्रेसने गोवा विधानसभा निवडणुकीसाठी उमेदवारांची यादी जाहीर केली आहे. यात खासदार लुईझिन फालेरो यांना फातोर्डा मतदारसंघातून उमेदवारी देण्यात आली आहे. मात्र लुईझिन फालेरो पक्षाच्या या निर्णयावर नाराज असल्याची चर्चा सध्या राजकीय गोटात रंगू लागली आहे. अद्याप फालेरो यांनी यावर कोणतीही जाहीर भूमिका मांडलेली नाही. (Luizinho Faleiro News Updates)

लुईझिन फालेरो (Luizinho Faleiro) यांना तृणमूलकडून उमेदवारी जाहीर झाल्यानंतर त्यांनी पत्रकार परिषदेतून काढता पाय घेतल्याचं बोललं जात आहे. फालेरो सध्या तृणमूल काँग्रेसकडून राज्यसभेवर खासदार आहेत, मात्र त्यांना आमदारकीचं तिकीट दिल्याने ते नाराज असल्याचं बोललं जात आहे. फालेरो यांनी आपला फोनही बंद ठेवल्याने वेगवेगळ्या तर्कवितर्कांना उधाण आलं आहे. दरम्यान आपण ही निवडणूक लढवण्यास इच्छुक नसल्याचं ते पक्षाला कळवणार असल्याची चर्चाही रंगू लागली आहे.

फातोर्डा मतदार संघातून लुईझिन फालेरो यांना तृणमूलची (TMC) उमेदवारी जाहीर झाल्यामुळे ते गोवा फॉरवर्डचे सर्वेसर्वा विजय सरदेसाईंविरोधात निवडणुकीच्या रिंगणात असतील. फालेरो यांना तृणमूल कडून उमेदवारी जाहीर झाल्यामुळे विजय सरदेसाई (Vijay Sardesai) आणि लुईझिन फालेरो यांच्यासाठी ही चुरशीची लढत ठरणार आहे. मात्र फालेरोंच्या नाराजीमुळे सरदेसाईंसमोरील आव्हान कमी होणार असल्याचं एकंदर चित्र आहे.