फोंडा, भारतीय जनता पक्षाचे लोकसभेचे उमेदवार श्रीपाद नाईक यांना निवडून आणण्यासाठी मगो-भाजपची युती असल्याने अंतर्गत मतभेद बाजूला ठेवून काम करूया आणि श्रीपाद भाऊंना मोठ्या मताधिक्क्याने निवडून आणूया, असे आवाहन मगो पक्षाचे अध्यक्ष तथा माजी मंत्री दीपक ढवळीकर यांनी केले.
मंगेशी येथील शिवरंजनी सभागृहात आज (शनिवारी) झालेल्या मगो पक्षाच्या वेलिंग प्रियोळ कुंकळ्येतील कार्यकर्ता मार्गदर्शन बैठकीत दीपक ढवळीकर बोलत होते.
यावेळी भाजपचे माजी अध्यक्ष तथा माजी राज्यसभा खासदार विनय तेंडुलकर तसेच जिल्हा पंचायत सदस्य दामोदर नाईक, माजी जिल्हा पंचायत सदस्य शिवदास गावडे, माजी सरपंच लक्ष्मीकांत खेडेकर, राजू नाईक, रंगनाथ कुंकळ्येकर, यामिनी कुंकळ्येकर, आदिती गावडे, हरिश्‍चंद्र जल्मी, परेश प्रभुगावकर तसेच इतर ज्येष्ठ कार्यकर्ते उपस्थित होते.
मगो पक्षाचे मांद्रेचे आमदार जीत आरोलकर यांच्याविरुद्ध वक्तव्य करणाऱ्या काँग्रेसचे आमदार युरी आलेमाव यांचे वक्तव्य आक्षेपार्ह आहे. युरींनी आधी माफी मागायला हवी. कुणावर वैयक्तिक टीका करण्याचा अधिकार युरींना नाही, त्यामुळे युरींचे वक्तव्य हे आक्षेपार्ह आणिनिषेधार्ह असल्याचेही दीपक ढवळीकर म्हणाले.
भोमचा प्रश्‍न सोडवण्यासाठी कटिबद्ध
मगो पक्षाचे अध्यक्ष दीपक ढवळीकर म्हणाले की, भोम गावातील मुख्य रस्त्याच्या प्रश्‍नावरून तेथील ग्रामस्थांनी भाजप सोडून इतरत्र मतदान करण्याचे जाहीर केले होते. पण तसे न करता हे ग्रामस्थ आमचेच बांधव असल्याने आता लोकसभा निवडणूक झाल्यानंतर हा प्रश्‍न सामोपचाराने सोडवण्यासाठी प्रयत्न करूया.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.