पणजी, दिल्लीत रविवारी होणाऱ्या केंद्रीय मंत्रिमंडळाच्या शपथविधीच्या निमित्ताने राज्यातील मंत्री आणि आमदारांना उद्या (ता. ८) दिल्लीत पोचा, असा निरोप भाजपने दिला आहे.
रविवारी होणाऱ्या शपथविधीसाठी शनिवारी रात्रीच दिल्लीत का, असा प्रश्न अनेक आमदारांना पडला असून रविवारी सकाळी दिल्लीत दक्षिण गोव्यातील पराभवाची कारणमीमांसा पक्षश्रेष्ठी करतील की काय, अशी शंका त्यांना येऊ लागली आहे. मंत्री, आमदारांना दिल्लीत होणाऱ्या शपथविधी सोहळ्याचे औपचारिक निमंत्रण पाठविले आहे.
शिवाय प्रदेशाध्यक्ष तानावडे यांनी मंत्री तसेच आमदारांंनी शनिवारी रात्रीच दिल्लीत पोचावे, असा निरोप दिला आहे. त्यात केवळ शपथविधी सोहळ्याचा उल्लेख असला तरी रविवारी सकाळी संघटनात्मक पातळीवरील बैठक घेतली जाण्याची शक्यता आहे.
दिल्लीत आज झालेल्या राष्ट्रीय लोकशाही आघाडीच्या बैठकीला मगोपचे अध्यक्ष दीपक ढवळीकर उपस्थित नव्हते. ते उद्या रात्री दिल्लीला निघणार आहेत. ‘बाहेरगावी असल्याने बैठकीस पोचू शकलो नाही. आज शपथविधीचे निमंत्रण मिळाले. उद्या दिल्लीला जात आहे’, असे ढवळीकर यांनी सांगितले.
मंत्रिपद श्रीपाद की, तानावडेंना?
केंद्रीय मंत्रिमंडळात श्रीपाद नाईक की सदानंद शेट तानावडे यापैकी कोणाला संधी मिळणार, याविषयी दिल्लीत आज (शुक्रवारी) सायंकाळपर्यंत निर्णय झालेला नव्हता. भाजपने आपल्या मंत्र्यांची यादी अद्याप राष्ट्रपती भवनाला सादर केली नसल्याची माहिती मिळाली आहे.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.