Loksabha Election 2024: लोकसभा निवडणुकीच्या आदल्या रात्री (६ मे २०२४ रोजी) काँग्रेस उमेदवार कॅ. विरियातो फर्नांडिस यांची वाडे येथील एक समर्थक महिला दाबोळी-नवेवाडेतील जय संतोषी माता मंदिराच्या बाजूस असलेल्या चाळीत पैसे वाटप करण्यासाठी आली होती.

काँग्रेस उमेदवाराची समर्थक महिला नवेवाडे चाळीत पैसे वाटप करीत असल्याचे दाबोळी भाजप मंडळाला समजताच त्यांनी मुरगाव निवडणूक आयोगाकडे (Election Commission) तक्रार केली. भरारी पथकाने त्वरित नवेवाडेतील चाळीत येऊन त्या कॉंग्रेसच्या महिला समर्थक व त्यांच्या एका साथीदारांची झडती घेतली. नंतर काँग्रेसच्या त्या दोघाही कार्यकर्त्यांना पोलिस स्थानकावर आणून त्यांच्याविरोधात भरारी पथकाने रितसर तक्रार दाखल केली.

काँग्रेस समर्थक महिलेने दाबोळी भाजप मंडळाचे कार्यकर्ते लोकसभा निवडणुकीत पैसे वाटप करीत असल्याची चुकीची माहिती प्रसारमाध्यमांना दिली आहे. खरे तर तीच महिला आपल्या एका कार्यकर्त्यासमवेत चाळीत पैसे वाटप करण्यासाठी आली होती, अशी तक्रार पोलिस स्थानकांत नोंद असल्याची माहिती दाबोळी भाजप मंडळाचे युवा नेते सचिन चौगुले यांनी दिली आहे.

काँग्रेस (Congress) पक्षाला आपला पराभव नजरेसमोर दिसत असल्यानेच दाबोळी भाजप मंडळाच्या पदाधिकाऱ्यांवर बिनबुडाचे आरोप ती महिला व त्यांचे पदाधिकारी करीत असल्याचा दावा दाबोळी भाजप गटाने केला आहे. दक्षिण गोवा लोकसभा निवडणुकीत भाजप उमेदवार पल्लवी धेंपे यांचा विजय निश्चित असल्यानेच काँग्रेस भाजपवर आरोप करत आहे.