Canacona News : श्रम धाम योजनेतील 20 लाभार्थींना आज त्यांच्या हक्काच्या घराच्या चाव्या लोकसभा अध्यक्ष ओम बिर्ला यांच्या हस्ते देण्यात आल्या. यावेळी मुख्यमंत्री डॉ. प्रमोद सावंत, खासदार श्रीपाद नाईक, सभापती रमेश तवडकर, भाजप प्रदेशाध्‍यक्ष सदानंद शेट तानावडे, मुरगावचे आमदार संकल्प आमोणकर उपस्थित होते.

ओम बिर्ला यांनी श्रम धाम योजनेतील घरांची पाहणी केली. योजनेतील लाभार्थ्यांची भेट घेतली. यावेळी ही योजना राबवल्याबद्दल बिर्ला यांनी काणकोणचे आमदार रमेश तवडकर यांचे आभार मानले. तसेच इतर लोकप्रतिनिधी या योजनेतून प्रेरणा घेतील अशी अपेक्षा त्यांनी व्यक्त केली.

"प्रधानमंत्री आवास योजनेअंतर्गत 3 करोड पेक्षा अधिक घरे बनवून लोकांच्या घरांचे स्वप्न पंतप्रधान मोदींनी पूर्ण केले. लोकांचे सहकार्य तसेच सार्वजनिक निधीतून काणकोण येथील नागरिकांचे घराचे स्वप्न पूर्ण झाले. सभापती तवडकर यांनी श्रम धाम योजना राबवली. याबद्दल त्यांचे आभार मानतो. इतर लोकप्रतिनिधी या योजनेतून प्रेरणा घेतील असे बिर्ला म्हणाले.

सभापती रमेश तवडकर यांनी काणकोण येथील श्री बलराम चॅरिटेबल फाऊंडेशनच्या वतीने श्रम धाम योजना साकारली. काणकोण परिसरात ज्यांना हक्काचे घर नाही किंवा जे आहे ते डबघाईस आले आणि त्याची दुरुस्ती करणे शक्य नाही, अशांना शोधून पक्के घर बांधून देण्याचे ध्येय त्यांनी बागळले.

नागरिकांच्या लोकसहभागातून श्रम धाम ही योजना राबवण्यात येते. ''एक दिवस श्रम आणि एक रुपया'' अशी या योजनेची रचना आहे. त्यानुसार लोकांच्या श्रमदानातून श्रम धाम योजनेतून २० घरे उभारली आहेत.