Liquor Rate Hike in Goa : सरकारने बिअर शुल्कदरात वाढ केल्याने सरकारी तिजोरीला वार्षिक 50 कोटी रुपये अतिरिक्त महसूल मिळेल आहे असा अंदाज आहे. परंतु या शुल्कदरवाढीचा फटका हा पर्यटकांना नाही तर थेट गोमंतकीय ग्राहकांनाच बसणार आहे. बिअर पिणाऱ्यांमध्ये 70 टक्के गोमंतकीय असून केवळ 25 ते 30 टक्केच पर्यटकांचा समावेश आहे. त्यामुळे पर्यटकांवर याचा परिणाम होणार नाही, असं मद्यविक्रेत्यांच्या संघटनेने स्पष्ट केलं आहे.

शुल्क वाढल्याने सामान्य बीयर किमान 15 रुपये प्रतिबाटली महाग होणार आहे. स्‍ट्राँग बीयर 20 ते 25 रुपये तर प्रिमियम 30 रुपये महाग होणार आहे. परंतु पर्यटकांना भारतीय उत्पादित विदेशी मद्य पसंतीचे असल्याने त्यांना जास्त फरक पडणार नाही. मात्र विदेशी मद्य आणि भारतीय उत्पादित विदेशी मद्य हे गोव्यात एकेकाळी स्वस्त होते. आता दक्षिण भारतातील राज्य वगळल्यास इतर राज्‍यांमध्ये गोव्याच्या तुलनेत मद्य स्वस्त दरात उपलब्ध आहे. त्यामुळे राज्यातील मद्यविक्रेत्यांना जबर फटका बसला आहे, असे गोवा मद्यविक्रेते संघटनेचे अध्यक्ष दत्तप्रसाद नाईक यांनी स्पष्ट केलं आहे.

कर्नाटक, केरळ, तामिळनाडू, आंध्रप्रदेश आणि तेलंगणा येथे मद्याचे दर गोव्यापेक्षा जास्त आहेत. राजस्थान, दिल्ली, उत्तर प्रदेश, हरयाणा, पश्‍चिम बंगाल सारख्या राज्‍यांमध्ये स्वस्त दरात मद्य मिळते. सरकारने विदेशी मद्य आणि भारतीय उत्पादित विदेशी मद्य शुल्क कमी करण्याची मागणी सध्या होऊ लागली आहे.

दुसरीकडे गोवा सरकारने इतरांच्या नावावर असलेले मद्यदुकान आणि बार परवाने भाडेपट्टीवर देण्याची तरतूद कायद्यात केली आहे. त्यासाठी अतिरिक्त 20 टक्के शुल्क द्यावे लागणार आहे. परंतु ही तरतूद केवळ गोमंतकीयांसाठीच असून बिगरगोमंतकीयांना भाडेपट्टीवर देणाऱ्यांवर सरकारने कारवाई करून त्यांचे मद्यपरवाने रद्द करण्याची मागणी केली जात आहे. तसंच मद्यपरवाने भाडेपट्टीवर गोमंतकीयांनाच दिले जात आहेत. यासाठी तपास यंत्रणा उभारण्याची मागणीही केली जात आहे.