Goa: म्हार्दोळ, मंगेशी परिसरात बिबट्याने धुमाकूळ घातला असून काल रात्री तर चक्क सीमेपाईण-म्हार्दोळ भागातून मध्यरात्री या बिबट्याने संचार करीत चार कुत्र्यांचा फडशा पाडला. सकाळी चारही कुत्री अर्धवट खालेल्या स्थितीत सापडली. या प्रकारामुळे या परिसरात घबराट पसरली असून वन खात्याने बिबट्याचा बंदोबस्त करावा, अशी जोरदार मागणी म्हार्दोळ, मंगेशीवासीयांनी केली आहे.

चार महिन्यांपूर्वी सीमेपाईण बागवाडा - म्हार्दोळ (Mardol) येथे एका घराच्या खोपटात मेलेला बिबट्या सापडला होता. हा बिबट्या कुत्र्यांची शिकार करण्यासाठी आला होता, मात्र स्वतःच जखमी असल्याने त्याने या घरालगत असलेल्या खोपटात आश्रय घेतला. मात्र सकाळी तो मृत झाला. त्यानंतर वन खात्याने व पोलिसांनी या मृत बिबट्याला तेथून हलवले होते.

म्हार्दोळ तसेच मडकईच्या रानवटी भागात रात्रीच्या वेळेला बिबट्यांच्या कायम डरकाळ्या ऐकायला मिळत आहेत. त्यामुळे परिसरातील लोक कायम भीतीच्या छायेत आहेत. रात्रीच्यावेळी कामावरून घरी परतणाऱ्या कामगारांनाही वाहनाच्या प्रकाशात बिबट्या (Leopard) रस्ता पार करताना आढळला होता. त्यामुळे भीतीत अधिकच वाढ झाली आहे. रात्री कामावरून घरी परतणाऱ्या कामगारांना धोका निर्माण झाला आहे. एकटेदुकटे घरी परतताना मनात भीती घेऊनच कामगारांना घर गाठावे लागते.

पहाटेच्या वेळेला ‘मॉर्निंग वॉक'ला जाणाऱ्या लोकांतही भीती पसरली असून बिबट्याचा हल्ला केव्हा, कसा होईल, गे सांगता येत नाही, असे येथील एक ग्रामस्थ राजेंद्र कोरगावकर यांनी सांगितले. बिबट्यांचा कायम या भागात संचार असल्याने लोक घाबरत असल्याने वन खात्याने याप्रकरणी त्वरित कारवाई करीत बिबट्यांचा पूर्ण बंदोबस्त करावा, अशी जोरदार मागणी स्थानिकांनी केली आहे.