Leopard Attack in Goa: मागील काही महिन्यांमध्ये राज्यात बिबट्याने हल्ला केल्याच्या अनेक घटना समोर आल्या आहेत. यामुळे नागरिकांमध्ये भीतीचे वातावरण पसरले आहे. माहितीनुसार, पेडण्यातही अशीच एक घटना समोर आली आहे.

वझरी येथील राजाराम नाईक यांच्या वासराचा गुरुवारी मध्यरात्री बिबट्याने फडशा पाडला. नाईक म्हणाले की, मी रात्री बारा वाजता गोठ्यात गेलो होतो. तोपर्यंत सर्वकाही ठीक होते. मात्र, सकाळी गोठ्यात गेलो असता, बिबट्याने वासराचा फडशा पाडल्याचे दिसून आले.

यानंतर त्यांनी पेडणे वन खात्याला फोन करून याची माहिती दिली. बिबट्याने वासराचे पोट फाडून कोथळा बाहेर काढून फस्त केल्याचे त्यांनी सांगितले. गेल्या काही वर्षांपासून नाईक यांच्या सुमारे 12 पाळीव जनावरांचा बिबट्याने फडशा पाडला आहे. त्यामुळे लवकरात लवकर या समस्येवर काहीतरी तोडगा काढा, अशी मागणी त्यांनी वन खात्याकडे केली आहे.

दरम्यान, मुळगाव येथे लोकवस्तीत संचार करणारा बिबट्या 14 ऑगस्ट रोजी मध्यरात्री वन खात्याने लावलेल्या पिंजऱ्यात अडकला. त्यामुळे मुळगावमधील जनता भयमुक्त झाली आहे. मात्र, दुसऱ्या बाजूने तालुक्यातील शिरगावसह डिंगणे-सुर्ल येथे बिबट्याचा संचार असल्याचे दिसून आले.

शिरगावातही एका बिबट्याने गेल्या काही दिवसांपासून दहशत माजवली आहे. शिरगाव पंचायत कार्यालयाच्या जुन्या इमारत परिसरात या बिबट्याचा संचार असल्याची माहिती मिळाली.