Leopard Attack In Goa: कावरे ते दानोळे या मुख्य रस्त्यावर बुधवारी (ता.6) सायंकाळी 7 वा.च्या दरम्यान मोहन वाडेकर कुर्पे तसेच त्यांचा भाऊ प्रदीप वाडेकर यांच्यावर चालत्या दुचाकीवर झडप घेऊन बिबट्याने प्राणघातक हल्ला केला.

यात मोहन वाडेकर गंभीर जखमी झाले. त्यांना केपे येथील आरोग्य केंद्रात पुढील उपचारासाठी दाखल केले आहे.

वन खात्याचे कर्मचारी घटनास्थळी पोहोचले असून पुढील कारवाई करीत आहेत. या घटनेने लोकांमध्ये भीती निर्माण झाली आहे.

सांगे तालुक्यातील रिवण ग्रामपंचायत क्षेत्रातील कावरे ते दानोळे रस्त्यावर बुधवारी सायंकाळी 7 वाजण्याच्या सुमारास चालत्या दुचाकीवर बिबट्याने हल्ला केला. यात मोहन वाडेकर हे गंभीर जखमी झाले.

त्यांच्यावर हल्ला करण्याच्या दहा मिनिटांपूर्वी नेत्रावळी येथील दोन युवकांवरही या बिबट्याने हल्ला केला होता; पण ते सुदैवाने बचावले, अशी माहिती मिळाली. तसेच त्या रस्त्याने चारचाकी बोलेरो जीप जाताना तिच्यावरही बिबट्याने हल्ला केला होता.

परिसरात भीतीचे वातावरण

या घटनेमुळे परिसरात भीतीचे वातावरण निर्माण झाले आहे. यापूर्वी अशा घटना घडल्या आहेत. वन खात्याचे कर्मचारी घटनास्थळी दाखल झाले होते. यापूर्वी एका गव्याने दुचाकीवर हल्ला केला होता.

स्थानिकांनी या घटनेची माहिती सांगेचे आमदार तथा समाजकल्याणमंत्री सुभाष फळदेसाई यांना दिली असून त्यांनी यासंदर्भात तातडीने चौकशी करून संबंधितांना योग्य त्या सूचना केल्या आहेत. यापूर्वीही वाळपईत बिबट्याने एका शेतकऱ्याची म्हैस आणि रेडा मारल्याची घटना घडली होती. त्यामुळे घबराट पसरली आहे.