सोमवारी रात्री गडगडाटासह आलेल्या पावसामुळे गोव्यात कित्येक ठिकाणची वीज गुल झाली होती. जोराचा वादळीवारा सुटल्याने अनेक ठिकाणचा वीजपुरवठा खंडित करण्यात आला होता. मडगावसह सासष्टी किनारपट्टीतील कित्येक गाव काळोखात राहिले.

शेळडे येथे मुख्य वीज केंद्रावर महाराष्ट्रातून येणारी वीज खंडित झाल्यामुळे केपेसह दक्षिण गोव्यातील कित्तेक गाव काळोखात होते. (Latest Goa Rain News Updates)

त्याचबरोबर डिचोली शहरासह अनेक ठिकाणीही अवकाळी पावसाचा तडाखा बसला. वाऱ्यासह पडलेल्या जोरदार पावसामुळे डिचोली शहरासह अनेक भागात दाणादाण उडाली. साधारण पाऊण तास जोरदार पर्जन्यवृष्टी झाली. पावसामुळे रस्त्यावर पाणी झाले. रात्री साडेदहा वाजेपर्यंत डिचोली अग्निशामक दलात झाडाची फांदी कोसळल्याच्या एकाच कॉलची नोंद झाली असली, तरी पाऊस आणि वाऱ्याचा वेग पाहता काही ठिकाणी पडझड झाल्याचे वृत्त आहे. वाऱ्यामुळे बहूतेक भागात वीज पुरवठाही खंडित झाल्याने रात्री उशीरापर्यंत सर्वत्र काळोखाचे साम्राज्य पसरले होते.