Sangem: उगे सांगे पंचायत क्षेत्रातील विकासनगर येथील वीस कलमी कार्यक्रमांतर्गत भूमिहीन लोकांना दिलेल्या शंभर मीटर भूखंडाची सखोल चौकशी करण्याची मागणी बोमी झोरे या महिलेने पत्रकार परिषदेत केली आहे. तिच्या सोबत उषा नाईक उपस्थित होत्या.

तिने दिलेल्या माहितीनुसार, आपल्याला दिलेल्या भूखंडात दुसरा भूखंड मालक कशा प्रकारे आपल्याला सतावत आहे, याची सविस्तर माहिती सर्व सरकारी खात्यांना लेखी स्वरूपात दिली.

तरी, आपल्याला न्याय दिला नाही म्हणून मुख्यमंत्री डॉ सावंत यांना भेटून सविस्तर तक्रार दिली. मुख्यमंत्री सावंत यांनी चौकशी करण्याचा आदेश दिला खरा पण आपल्याला न्याय न देता उलट आपलीच जमीन दुसऱ्यांना देण्यात आली आहे.

या विकासनगरात आतापर्यंत दिलेले भूखंड मूळ मालकांच्या हातात न राहता कोणाच्या तरी इशाऱ्यावर मूळ मालकांनी मोठ्या प्रमाणात सरकारने दिलेले भूखंड दुसऱ्यांना परस्पर विकण्याचें सत्र सुरु केले आहे. मोठ्या प्रमाणात पैशाची उलाढाल करून भूखंड लाटण्याचे प्रकार या वसाहतीत घडले आहेत, असे तिने संगितले.