पणजी: जमीन हडपप्रकरणी अटक केलेल्या भू माफिया संशयित सिद्दीक्की ऊर्फ सुलेमान खान याच्याविरुद्ध क्राईम ब्रँच पोलिस कोठडीतून पलायन केल्याप्रकरणी जुने गोवे पोलिसांनी गुन्हा दाखल केला होता. या गुन्ह्याचा तपास स्वतंत्र तसेच निःपक्षपातीपणे होण्यासाठी हे प्रकरण केंद्रीय अन्वेषण विभागाकडे (सीबीआय) देण्याचा आदेश मुंबई उच्च न्यायालयाच्या गोवा खंडपीठाने उत्तर गोवा पोलिस अधीक्षकांना देण्यासंदर्भात त्याने केलेला फौजदारी अर्ज खंडपीठाने आज फेटाळला.

जुने गोवे पोलिसांनी संशयित सुलेमान खान याच्याविरुद्ध कोठडीतून पलायन केल्याचा गुन्हा दाखल करून त्यामध्ये आरोपपत्रही पोलिसांनी न्यायालयात सादर केले आहे. या आरोपपत्रामध्ये असलेले बहुतेक साक्षीदार हे पोलिस आहेत. त्याला कोठडीतून बाहेर काढून कर्नाटक (Karnataka) येथे एका प्रकरणाचा पंचनामा करायचा असल्याचे सांगून मोटारसायकलने एका पोलिस हवालदाराने नेले.

यामागे क्राईम ब्रँच पोलिसांचे कटकारस्थान आहे. या प्रकरणाचा तपास योग्य दिशेने झालेला नाही. आरोपपत्र दाखल झाले तरी तपासकाम स्वतंत्र तपास यंत्रणेकडे देता येतो यासंदर्भातचा निवाडा सर्वोच्च न्यायालयाने (Supreme Court) दिलेला आहे. त्याच्याविरुद्ध ७ प्रकरणे पोलिसांत नोंद असली तरी ती सर्व जमीन हडप प्रकरणाची आहेत.

या पलायनाच्या कटकारस्थानमध्ये काही पोलिसांचाही समावेश आहे. त्यामुळे या प्रकरणाचा तपास निःपक्षपाती होण्यासाठी सीबीआयकडे देण्याचे निर्देश खंडपीठाने पोलिस अधिक्षक अक्षत कौशल व जुने गोवे पोलिस (Goa Police) निरीक्षक सतीश पडवळकर यांना द्यावेत अशी विनंती करण्यात आली. दरम्यान, सरकारी वकिलांनी संशयित सुलेमान खान याच्या अर्जाला आक्षेप घेतला. सध्या तो न्यायालयीन कोठडीत आहे. त्याने पोलिस हवालदाराला आमिष दाखवून कोठडीतून पलायन केले होते.