म्हापसा : शेजारच्या भाडेकरू महिलेवर हल्ला केल्याच्या आरोपाखाली कोलवाळ पोलिसांनी संशयित माय-लेकीला अटक केली. नंतर या दोघींची जामिनावर सुटका झाली. हा प्रकार मायणा पाटो, कामुर्ली येथे घडला. दरम्यान, म्हापसा न्यायालयाने या संशयित माय-लेकीची सशर्त जामिनावर सुटका केली. प्रत्येकी 10 हजार रूपये हमी आणि तितक्याच रकमेचा हमीदार आणि गोवा सोडून न जाणे तसेच तक्रारीत हस्तक्षेप न करणे, अशा अटी घातल्या आहेत.

पोलिसांच्या माहितीनुसार, सदर घटना बुधवारी सकाळी 10 च्या सुमारास घडली. बोरीकडे मायणा पाटो कामुर्ली येथे एका घरात निसाद व कांबळी सुवारीस ही दोन कुंटूंबे भाडेकरू म्हणून शेजारी राहतात. त्यांना खोलीत जाण्यासाठी एकच वाट असून त्यावरून वारंवार खटके उडत. बुधवारी संशयित माया व जोस्लीन सुवारीस यांनी तक्रारदार मदनची पत्नी रूपाली निसाद (41) हिच्यावर सळीने वार केला. यात त्या जखमी झाल्या. हवालदार सुनिल मांद्रेकर तपास करीत आहेत.