काणकोण: राज्यातील तिसऱ्या कुशावती जिल्ह्यात काणकोण तालुक्याचा समावेश करू नये. अन्यथा तीव्र आंदोलन छेडण्याचा सज्जड इशारा श्रीस्थळ येथील बैठकीत देण्यात आला.

या बैठकीस प्रशांत पागी, संदेश तळेकर, जनार्दन भंडारी, विकास भगत, अनिल फळदेसाई, शैलेश पागी मोहनदास लोलयेकर, प्रशांत नाईक, अनंत अग्नी आणि मान्यवर उपस्थित होते.

नव्या कुशावती जिल्ह्यात काणकोण तालुक्याचा समावेश करू नये, असा ठराव आज श्रीस्थळ येथे घेण्यात आलेल्या बैठकीत सर्वानुमते घेण्यात आला. काणकोण तालुक्यातील स्थानिक स्वराज संस्थांचे प्रतिनिधी, सामाजिक तसेच राजकीय कार्यकर्ते या बैठकीला उपस्थित होते.

मुख्यालय कुडचडेत हवे!

तिसऱ्या जिल्ह्यातून काणकोण तालुका वगळावा, असा एक वेगळा प्रवाह निर्माण झालेला असतानाच ‘कुशावती’ या तिसऱ्या जिल्ह्याचे मुख्यालय केपे येथे न करता कुडचडे येथे करावे, अशी मागणी आज भारतीय जनता युवा मोर्चाने केली आहे.