फोंडा: कुंडई औद्योगिक वसाहतीत शुक्रवारी (ता. १) दुपारी घडलेल्या एका दुर्दैवी अपघातात ३६ वर्षीय कामगार थेबू मुंडा याचा मृत्यू झाला. झारखंडचा रहिवासी असलेला थेबू मुंडा काही वर्षांपासून कुंडई भागात वास्तव्यास होता.

सदर घटना छत दुरुस्तीचे काम सुरू असताना घडली. उंचावर काम करत असताना तो तोल जाऊन खाली कोसळला. त्यामुळे त्याच्या डोक्याला गंभीर इजा झाली. अपघातानंतर त्याला तातडीने मडकई आरोग्य केंद्रात दाखल करण्यात आले. मात्र, प्रकृती गंभीर असल्यामुळे पुढील उपचारांसाठी बांबोळी येथील गोवा वैद्यकीय महाविद्यालयात हलवण्यात आले.

तेथे डॉक्टरांनी उपचार सुरू असतानाच थेबू मुंडा याला मृत घोषित केले. या घटनेमुळे संबंधित औद्योगिक आस्थापनात हळहळ व्यक्त केली जात आहे. कामगारांच्या सुरक्षेच्या दृष्टीने आवश्यक उपाययोजना आणि सुरक्षाकवच वापरण्यात आले होते का, याबाबत तपास सुरू आहे.

फोंडा पोलिसांनी या घटनेची नोंद घेतली असून पुढील तपास सुरू आहे. दरम्यान, कामगार संघटनांनी या अपघाताची गंभीर दखल घेऊन कामगारांच्या सुरक्षिततेसंबंधी कठोर नियमावली अमलात आणण्याची मागणी केली आहे.