Goa Accidental Deaths: ..अजून किती लोकांचे जीव जाणार? गोव्यात अपघाती बळींचे दीडशतक; 25 जुलैपासून सात जणांचे मृत्यू

मडगाव: दर तिसऱ्या दिवसाला एक अपघाती बळी, हे चित्र आता नित्याचे झाले असून यंदाच्‍या पहिल्‍या सात महिन्‍यांतच गोव्‍यातील रस्‍त्‍यांवरील बळींनी दीड शतकी आकडा गाठला असून ३१ जुलैपर्यंत बळींची संख्‍या १५६ झाली आहे. एका जुलै महिन्‍याचीच आकडेवारी पाहिल्‍यास ३१ दिवसांत १९ बळींची नाेंद झाली असून गोव्‍यातील एकंदर परिस्‍थिती पाहता ती भयानक पातळीवर पोचली आहे.

पर्रा येथे बुधवारी रात्री दोन दुचाकींची समोरासमोर धडक बसल्‍याने ओंकार कारापूरकर (२५) आणि महमद फराज (३०) या दोघांचे बळी गेले असून अन्‍य दोघे गंभीर जखमी झाले आहेत. २५ जुलैपासून हा मृत्‍यूंचा सिलसिला अधिकच वाढला असून या सात दिवसांत सात जणांचे बळी गेले. या सात बळींपैकी पाचजण दुचाकी चालविणारे असून एकटा दुचाकीच्‍या मागे बसणारा आहे. तर या एका आठवड्यात एका पादचाऱ्याचाही बळी मुंगूल मडगाव येथील पश्‍चिम बगलमार्गावर गेला आहे.

या जुलै महिन्‍याची १० आणि १८ तारीख ही अधिक धक्‍का देणारी असून १० जुलै रोजी बेतोडा येथे दोन दुचाकींमध्‍ये झालेल्‍या अपघातात एका युवकासह युवतीचा बळी गेला होता तर अन्‍य दोघेजण गंभीर जखमी झाले होते.

१८ जुलै रोजी एकूण तीन अपघात होऊन तिघांचे बळी गेले होते. हे तिन्‍ही अपघात दुचाकीशी संबंधित असून दोन अपघातात अन्‍य वाहनांनी धडक दिल्‍यामुळे दोघा दुचाकी चालकांचा बळी गेला होता तर तिसऱ्या घटनेत काणका-म्‍हापशात दुचाकीच्‍या स्‍वयंअपघातात मागे बसलेली महिला खाली पडून तिचे निधन झाले होते. खडबडीत रस्‍त्‍यामुळे हा अपघात झाला होता. २८ जुलै रोजी उसगावात अशाच एका खराब रस्‍त्‍याचमुळे दुचाकी चालकाचा ताबा गेल्‍याने तो पडून जखमी होऊन नंतर त्‍याचे निधन झाले.

जुलैमध्ये १९ बळी

जुलै महिन्‍यात जे १९ जणांचे बळी गेले आहेत, त्‍यातील १३ जण दुचाकी चालक आहेत. तिघेजण दुचाकीच्‍या मागे बसलेले तर ३ पादचाऱ्यांचा समावेश आहे.