मुंबई: मुंबईतून गोव्याला जाणारी नवी ट्रेन सुरु करण्यात आली आहे. पश्चिम रेल्वे मार्गावरून गोव्यासाठी धावणाऱ्या या ट्रेनबाबत कोकणवासीयांनी नाराजी व्यक्त केली आहे. वांद्रे टर्मिनस ते मडगाव एक्सप्रेसचे थांबे आणि वेळापत्रक यावरुन कोकण रेल्वे प्रवासी संघटनेने नाराजी व्यक्त व्यक्त केली आहे.
कोकण रेल्वे प्रवासी संघटनेने वसई सावंतवाडी पॅसेंजर अथवा स्लो मधू दंडवते एक्सप्रेस सुरु करण्याची मागणी गेल्या काही वर्षापासून केली जात आहे. पॅसेंजर ट्रेनची मागणी असताना सुपरफास्ट ट्रेन का देण्यात आली शिवाय त्यांचे थांबे देखील सर्व कोकणवासीयांच्या फायद्याचे नाहीत, अशा शब्दात संघटनेने नाराजी व्यक्त केली आहे.
आम्ही कोकणासाठी रेल्वे मागतोय तुम्ही गोव्यासाठी देताय? रात्रीसाठी ट्रेनची मागणी असताना तुम्ही दिवसा सुरु केली. वांद्रे टर्मिनस ते मडगाव एक्सप्रेसचे कोकणासाठी केवळ सात रेल्वे स्थानकासाठी थांबे देण्यात आले असून, कोकण रेल्वेने कोकणी माणसाच्या जखमेवर मीठ चोळण्याचे काम केले आहे, असे संघटनेने म्हटलंय.
महाराष्ट्राने कोकण रेल्वेसाठी २२ टक्के गुंतवणूक केली त्यांच्या वाट्याला केवळ मध्य रेल्वेच्या तीनच गाड्या आल्या आहेत. वांद्रे - मडगाव एक्सप्रेस पॅसेंजर किंवा स्लो एक्सप्रेस चालवण्याची मागणी संघटनेने केली आहे.
नव्याने सुरु झालेल्या वांद्रे टर्मिनस - मडगाव एक्सप्रेसला रत्नागिरी सिंधुदुर्गातील ३४ रेल्वे स्थानकांवर थांबाच दिलेला नाही, असेही संघटनेने म्हटले आहे.
वांद्रे टर्मिनस - मडगाव एक्सप्रेस नियमित सुरु करुन एक जनरल डब्बा वसई रोड स्टेशनसाठी राखीव ठेवावा. तसेच, किमान एका तालुक्यासाठी थांबा देण्यात यावा अशी मागणी प्रवासी संघटनेने केली आहे.
दिव्यावरून सावंतवाडी पर्यत पॅसेंजर किंवा स्लो एक्सप्रेस जाऊ शकते तर वांद्रे ते सावंतवाडी पॅसेंजर का शक्य नाही? असा सवाल देखील संघटनेने उपस्थित केला आहे.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.