रत्नागिरी: फळांचा राजा आणि कोकणातच नव्हे तर जगभरात ज्याच्या अविट गोडीची चर्चा आहे त्या हापूसच्या मानांकनावरून आता वाद सुरू झाला आहे. ‘कोकण हापूस’वर गुजरातने दावा केला आहे.

‘गुजरात-वलसाड हापूस’ म्हणून भौगोलिक मानांकनाची मागणी करण्यात आली आहे; परंतु २०१८ मध्येच ‘कोकण हापूस’ला कायदेशीर मानांकन मिळालेले आहे. यासाठी गेली दहा वर्षे प्रयत्न सुरू होते. आता ‘कोकण हापूस’ मानांकन अन्य कोणी वापरणे गैर आहे.

हे मानांकन संरक्षित ठेवण्यासाठी वेळप्रसंगी कायदेशीर लढाई लढू, असा इशारा कोकण हापूस उत्पादक व विक्रेते संघाकडून देण्यात आला आहे. जगात प्रामुख्याने अमेरिका, ऑस्ट्रेलियातील खवय्यांना कोकण हापूसची गोडी लागली आहे; पण, याच ‘कोकण हापूस’वर ‘गुजरात- वलसाड हापूस’ म्हणून भौगोलिक मानांकनाची मागणी करण्यात आली आहे. त्यामुळे कोकणातील आंबा बागायतदारांची चिंता वाढली आहे.

जगात ‘कोकण हापूस’, हे ‘हापूस आंब्याला’ मिळालेले पहिले आणि एकमेव भौगोलिक मानांकन आहे. आंब्याच्या हंगामात आणि खरेदी-विक्रीत हापूसचा बोलबाला जास्त असल्यामुळे प्रत्येकाला हापूस मानांकन हवे आहे. कोकण हापूसला मानांकन मिळाल्यानंतर पहिल्यांदा ‘शिवनेरी हापूस’ आंबा नावाने २०२२ मध्ये भौगोलिक मानांकनासाठी नारायणगाव कृषी विज्ञान केंद्राने अर्ज केला आहे.