Kiteboarding Competition भारतीय राष्ट्रीय काईटबोर्डिंग स्पर्धेत केओना रजनी हिने महिलांच्या ट्विन टिप प्रकारात, वरुण नारायणन याने पुरुषांच्या ट्विन टिपमध्ये, तर आशिष राव याने फॉर्म्युला फॉईल प्रकारात विजेतेपद पटकावले. स्पर्धा मांद्रे येथील जुनसवाडो समुद्रात झाली.

स्पर्धेच्या शेवटच्या दिवशी वाऱ्याचा वेग 11 नॉट्स इतका खाली आला होता, त्याचा परिणाम ट्विन टिप प्रकारातील शर्यतींवरही झाला. स्पर्धेच्या कालावधीत मागील दोन दिवस 18 नॉट्स वेगाने वारे वाहत होते.

स्पर्धेत पुरुष गटात अंतिमपूर्व दिनी ॲलेक्झांडर ऑस्टान्निन आघाडीवर होता, मात्र अखेरच्या दिवशी चारपैकी तीन शर्यतीत श्याम राव याने, तर एक शर्यत वरुण नारायणन याने जिंकली.

तीन लढतीत वरुण उपविजेता ठरल्यानंतर सर्वसाधारण क्रमवारीत तो अव्वल ठरला आणि ॲलेक्झांडर तिसऱ्या क्रमांकावर घसरला. श्याम उपविजेता बनला.

फॉर्म्युला काईट प्रकारात आशिष राव याने अखेरच्या तिन्ही शर्यती जिंकून अव्वल स्थान कायम राखले. महिलांत केओना रजनीने निर्विवाद वर्चस्व राखताना सर्व बाराही शर्यती जिंकण्याचा पराक्रम साधला. भारतीय यॉटिंग संघटनेचे अध्यक्ष ॲडमिरल करणबीर सिंग, सचिव कॅप्टन दीक्षित यांच्या उपस्थितीत बक्षीस वितरण झाले.