फोंडा: कवळे येथे एका घराला आग लागून मायलेक जखमी झाले आहेत. भाजल्याने त्यांना बांबोळी इस्पितळात उपचारासाठी दाखल करण्यात आले आहे. आगीत घराचेही मोठे नुकसान झाले आहे.

मनरथी नाईक (वय ६९) आणि गौरेश नाईक (वय ३५) अशी दोघांची नावे आहेत. त्यांची प्रकृती सध्या ठीक असल्याचे डॉक्टरांनी सांगितले. गाळशिरे-कवळे येथील मनरथी नाईक यांच्या घराला शुक्रवारी सकाळी दहाच्या सुमारास अचानक आग लागली.

मनरथी नाईक आजारी असून ती घरातच झोपल्या होत्या. अमित नाईक या मुलाने चहा करण्यासाठी चुलीवर भांडे ठेवले आणि लाकडे पेटवली. त्यावेळी आग अचानक भडकून जवळच साठवून ठेवलेल्या लाकडांच्या ढिगाऱ्याला लागली.

आग भडकल्याने स्थानिकांनी बाहेर असलेल्या मोठा मुलगा गौरेश याला कळवल्यानंतर त्याने धाव घेऊन आगीच्या लपेट्यातून आईला बाहेर काढले. त्यात गौरेश आणि मनरथी भाजल्या. अमितने पळ काढल्याने तो बचावला. दोघांवरही उपचार सुरु आहेत.