Colvale House Fire: कोलवाळमध्ये भीषण आग! क्षणार्धात घर जळून खाक, 7 लाखांचं नुकसान

कोलवाळ येथील एका घराला शुक्रवारी भीषण आग लागली. या आगीत झेवियर फर्नांडिस यांचे राहते घर पूर्णपणे जळून खाक झाले असून, त्यांचे अंदाजे ७ लाख रुपयांचे नुकसान झाले आहे. सुदैवाने, या दुर्घटनेत कोणतीही जीवितहानी झाली नाही, मात्र घरातील मौल्यवान वस्तू आणि महत्त्वाची कागदपत्रे आगीच्या भक्ष्यस्थानी पडली आहेत.

मिळालेल्या माहितीनुसार, ही आग शॉर्ट सर्किटमुळे लागली असावी, असा प्राथमिक अंदाज व्यक्त केला जात आहे. सकाळी अचानक घराच्या एका भागातून धूर निघू लागला आणि पाहता पाहता आगीने रौद्र रूप धारण केले. आगीच्या ज्वाळा इतक्या भीषण होत्या की घरातील सामानाला बाहेर काढण्याची संधीही कुटुंबियांना मिळाली नाही.

आगीची माहिती मिळताच म्हापसा अग्निशमन दलाचे जवान घटनास्थळी दाखल झाले. स्थानिक नागरिकांनीही तातडीने धाव घेत पाण्याचा मारा करून आग विझवण्यासाठी शर्थीचे प्रयत्न केले. अग्निशमन दलाच्या जवानांनी अथक प्रयत्नांनंतर आग आटोक्यात आणली, ज्यामुळे आग शेजारील घरांपर्यंत पसरण्यापासून रोखण्यात यश आले. मात्र, तोपर्यंत फर्नांडिस यांच्या घरातील टीव्ही, लॅपटॉप, सोन्याचे दागिने आणि रोख रक्कम जळून राख झाली होती.