पेडणे: कासारवर्णे येथील सरकारी माध्यमिक विद्यालयाच्या इमारतीच्या खिडक्यांच्या काचा फोडण्यासह नळाची जोडणी तोडल्याचा प्रकार सोमवारी सकाळी उघडकीस आला. या प्रकाराची माहिती मिळताच पेडणे शिक्षण अधिकारी अलिशा यांनी शाळेला भेट देऊन पाहणी केली. याप्रकरणी अज्ञात व्यक्तींविरुद्ध मोपा पोलिस स्थानकात तक्रार नोंदविण्यात आली आहे.

शाळेच्या इमारतीजवळ टाकून दिलेल्या दारूच्या बाटल्या आढळून आल्या असून, त्याच बाटल्या खिडक्यांच्या काचांवर फेकून मारण्यात आल्याचा प्राथमिक अंदाज व्यक्त करण्यात येत आहे. तसेच शाळेची नळाची जोडणीही तोडण्यात आल्याचे निदर्शनास आले. त्यामुळे शाळेच्या मालमत्तेचे नुकसान करणाऱ्या समाजकंटकांचा शोध घेऊन त्यांच्यावर कठोर कारवाई करण्याची मागणी करण्यात आली आहे.

घटनेची माहिती मिळाल्यानंतर कासारवर्णेच्या सरपंच सोनम परब, पंचायत सदस्या अवनी गाड व वृषाली नाईक, पालक-शिक्षक संघाचे अध्यक्ष पांडुरंग नाईक, गोवा प्रदेश काँग्रेसचे सचिव ॲड. जितेंद्र गावकर, समाजसेवक उदय महाले, प्रकाश किनळेकर आणि रमाकांत तुळसकर यांनी शाळेला भेट देऊन पाहणी केली. त्यांनी या प्रकाराचा निषेध केला.

दरम्यान, शाळेच्या परिसरात वारंवार अशा घटना घडू नयेत, यासाठी सीसीटीव्ही कॅमेरे बसवावेत तसेच शाळेच्या सुरक्षेसाठी पहारेकरी नियुक्त करावा, अशी मागणी यावेळी करण्यात आली. शाळेच्या मालमत्तेचे नुकसान करणाऱ्या समाजकंटकांचा शोध घेऊन त्यांना तातडीने अटक करावी, अशी मागणीही करण्यात आली.