मडगाव: चार दिवसांपूर्वी मडगावातील एका हॉटेलच्या दुसऱ्या मजल्यावरून  खाली पडून मरण पावलेला मूळ कर्नाटकातील कारवार जिल्ह्यातील भटकळ येथील बशीर अहमद (३८) याचा मृत्‍यू हा अपघाती नसून त्‍याला मुद्दामहून दुसऱ्या मजल्‍यावरून खाली ढकलून त्याचा खून केल्‍याचे उघड झाले आहे.

यातील आश्‍चर्यकारक अशी गोष्‍ट म्‍हणजे, हा खून ज्‍याने केला तो  संशयित एच. रफिक याचाही मृतदेह केरळातील कोची येथे सापडल्याने या एकंदर प्रकरणाचे गूढ वाढले आहे. या सर्व प्रकरणाचा  तपास करून सत्य उघडकीस आणण्याचे कठीण आव्हान आता मडगाव पोलिसांसमोर उभे ठाकले आहे.

 शहरातील स्टेशन रोड येथील ग्रीन व्हिव हॉटेलात ३० एप्रिल  रोजी वरील घटना घडली होती.  ज्या खोलीत बशीर राहत होता. त्या खोलीच्‍या दरवाजाला आतून कडी लावली होती. नंतर पोलिसांनी ती उघडली असता काही संशयास्पद बाबी आढळून आल्या होत्या. पोलिसांनी तपास काम सुरू केले असता  बशीरला  दुसऱ्या मजल्यावरून खिडकीतून खाली फेकून दिल्याने त्याचा मृत्यू झाल्याचे उघड झाले होते.

मागाहून   मडगाव पोलिसांनी  खून म्हणून  हे प्रकरण नोंदवून घेतले.  पोलिस निरीक्षक सूरज सामंत यांच्या मार्गदर्शनाखाली सध्या पुढील तपास सुरू आहे.  पोलिसांना तपासात रफिकनेच  बशीरला  हॉटेलच्या दुसऱ्या रूममधील खिडकीतून बाहेर फेकून दिले होते असे आढळून आले.

सुरुवातीला पोलिसांनी अनैसर्गिक मृत्यू म्हणून हे प्रकरण नोंदवून घेतले होते. शवचिकत्सा  अहवालात बशीरच्या शरीरावर जखमा आढळून आल्या होत्या. हॉटेलातील सीसीटीव्ही फुटेज पोलिसांनी  तपासले त्यावेळी संशयित हॉटेलातील जिन्यावरून खाली उतरत असल्याचे  दिसून आले होते.  पोलिसांना त्याच वेळी त्याच्यावर संशय बळावला होता. त्याचा मोबाईल नंबर मिळवून, पोलिसांनी त्याचा माग काढण्याचा प्रयत्न  सुरू केला होता. सुरुवातीला  त्याचे लोकेशन भटकळ येथे मिळत होते. मात्र, नंतर त्याचा मोबाईल बंद होता. त्यानंतर पोलिसा,नी  त्याचा  शोध सुरूच केला होता.

दरम्यान, कोची  येथे रेल्वेत रफिकचा मृतदेह सापडल्याची माहिती मडगाव पोलिसांना  मिळाली. वर्णनानुसार   तो मृतदेह रफिकचा असल्याचे उघड झाले आहे. त्याचा कुणीतरी काटा काढला असावा, असा पोलिसाना संशय आहे.

सासष्टीत खुनाच्या घटनांत वाढ

सध्या सासष्टीत  खुनाच्या घटना वाढत आहेत. मायणा-कुडतरी पोलिस ठाण्यात दोन तर फातोर्डा येथे एका खुनाची घडली आहे. या खुनांचा पोलिसानी  छडा लावताना संशयितांना अटकही  केली आहे.  स्टेशन रोड येथे घडलेल्या या खुनाचा माग आता पोलिस काढत आहे. तूर्त तपासाबाबत पोलिसांनी  गुप्तता बाळगली आहे.