Lightning strike death Goa

मडगाव: दक्षिण गोव्यातील कोलवा येथे भाड्याच्या खोलीबाहेर ३८ वर्षीय व्यक्तीचा मृतदेह आढळला. कर्नाटक राज्यातील हा व्यक्ती असून, तो राहत असलेल्या भाड्याच्या खोलीबाहेर अत्यवस्थ स्थितीत पडलेला होता. वीज कोसळून त्याचा मृत्यू झाल्याचा संशय पोलिसांकडून व्यक्त करण्यात आला आहे.

कोलवा येथे ३८ वर्षीय व्यक्तीचा मृतदेह गुरुवारी आढळून आला. हा व्यक्ती उत्तर कन्नड, कर्नाटक येथील रहिवासी असल्याची माहिती समोर आली आहे. पोलिसांनी घटनास्थळी दाखल होत पंचनामा करुन मृतदेह ताब्यात घेतला. पोलिसांनी व्यक्तीला दक्षिण गोवा जिल्हा रुग्णालयात दाखल केले पण, त्याला मृत घोषित करण्यात आले.

पोलिसांनी दिलेल्या माहितीनुसार, कोलवा येथे हा व्यक्ती भाड्याच्या खोलीत राहत होता. खोलीबाहेर तो अत्यवस्थ अवस्थेत आढळून आला दरम्यान, काही वेळातच त्याचा मृत्यू झाला. शवचिकित्सा तपासणीत त्याचा मृत्यू विद्युत धक्क्याने आलेल्या झटक्यामुळे मृत्यू झाल्याचे सांगण्यात आले आहे. दरम्यान, याबाबत अधिक तपास सुरु आहे.

गुरुवारी रात्री वादळी वाऱ्यासह वीजांचा कडकडाट झाला होता. यावेळी वीज कोसळून या व्यक्तीचा मृत्यू झाल्याचे सांगितले जात आहे दरम्यान, याबाबत अद्याप अधिकृत माहिती समोर आलेली नाही. पोलिस याप्रकरणी तपास करत आहेत. मृतदेह अंत्यविधीसाठी कुटुंबीयांकडे सोपविण्यात आला आहे.