गोव्यात अपघातांची संख्या काही केल्या कमी होताना दिसत नाही. राज्यात दुचाकी, चारचाकी अपघात होऊन त्यात मृत होणाऱ्यांची संख्या देखील वाढत आहे. प्रशासनाकडून वाहतूक नियम मोडणाऱ्या वाहन चालकांवर सक्त कारवाई केली जात असताना देखील अपघात होताना दिसत आहेत.

विशेषत: दुचाकीचे अपघात अधिक होत आहेत. मागील काही दिवसांपूर्वी उत्तर गोव्यात विविध अपघातात चार ते पाच जणांनी आपला जीव गमावला होता. दरम्यान, आज देखील वागातोर येथे झालेल्या अपघातात एका तरूणाचा मृत्यू झाला आहे.

वागातोर (बार्देश) येथे गुरूवारी सकाळी 7.30 वा. पेट्रोल पंपानजीक 16 वर्षीय युवकाचा अपघात झाला. या स्वयंअपघातात सूरज चव्हाण (वय 16, मूळ राहणार कर्नाटक) याचा मृत्यू झाला. सूरज वागातोर येथून म्हापशाच्या दिशेने जात असताना हा अपघात झाला.

सूरजचा दुचाकीवरील ताबा सुटल्याने त्याने आंब्याच्या झाडाला जोराची धडक दिली व तो खाली कोसळला.

दरम्यान, घटनेची माहिती मिळताच हणजूण पोलिसांनी घटनास्थळी धाव घेतली. पोलिसांनी तात्काळ जखमी सूरजला म्हापसा जिल्हा रूग्णालयात दाखल केले. डॉक्टरांनी सूरजला मृत घोषित केले. पोलिस अधिक तपास करीत आहेत.