कारगिल विजय दिनाच्या निमित्ताने आज सोमवारी येथील आझाद मैदानावर माजी सैनिक कल्याण संघटना आणि पूर्व सैनिक सेवा परिषद यांच्या वतीने कारगिल युद्धाच्या स्मृतींना मान्यवरांनी उजाळा दिला. यावेळी मुख्यमंत्री डॉ. प्रमोद सावंत, भाजप प्रदेशाध्यक्ष सदानंद शेट तानावडे, महापौर रोहित मोन्सरत यांनी आझाद मैदानाच्या हुतात्मा स्मारकाला पुष्पचक्र वाहिले. मुख्यमंत्री डॉ. सावंत यांनी कारगिल विजय ही घटना देशासाठी अभिमानास्पद असून गोव्याच्या सपुत्रांनी दिलेले योगदान अविस्मरणीय आहे, असे सांगितले. (Kargil Vijay Diwas: Goa CM Pramod Sawant laid a wreath at Martyrs Memorial on Azad Maidan panjim)

कारगिल विजय दिवसानिमित आयोजित विविध स्पर्धातील विध्यार्थ्यांना यावेळी प्रशस्तीपत्र वितरित करण्यात आली. माजी सैनिक कल्याण संघटनेचे अध्यक्ष अनंत जोशी यांच्यासह कारगिल युद्धातील सहभागी अधिकारी व सैनिक उपस्थित होते.

कारगिल युद्धात भारताच्या विजय मिळवून 22 वर्षे झाली आहेत. जगातील सर्वोच्च रणांगणावर भारतीय सैन्याने पाकिस्तानला चोख प्रत्युत्तर दिले आणि त्यांना गुडघे टेकण्यास भाग पाडले होते. जनरल परवेझ मुशर्रफ यांचे खोटे षड्यंत्र रचण्यात पाकिस्तानी सैन्य गुंतले होते.

पाकिस्तानच्या राज्यकर्त्यांनी सर्व दोष दहशतवाद्यांना घालायला सुरुवात केली होती आणि कारगिल हल्ल्यात पाकिस्तान सैन्याचा सहभाग स्पष्टपणे नाकारला होता. युद्धात मारल्या गेलेल्या त्याच्या शहीद सैनिकांना ओळखण्यास नकारही दिला होता. पण कारगिलच्या डोंगरावर विखुरलेल्या पुराव्यांनी साक्ष दिली आणि त्याचा खोटेपणा उघडकीस आणला.