डिचोली: कारापूर येथील वासंती रामा सालेलकर या अविवाहित महिलेच्या मृत्यूप्रकरणाची सखोल चौकशी करुन दोषी विरोधात कडक कारवाई करा. मृत वासंती हिच्या कुटुंबाला न्याय द्या, अशी मागणी करीत सामाजिक कार्यकर्त्यांनी भव्य ‘मूक मशाल मोर्चा’ काढून डिचोलीच्या पोलिस स्थानकावर धडक दिली.

वासंतीचा मृत्यू हा अपघात नसून, तो खुनाचाच प्रकार आहे. यामागे भू-माफियांचा हात आहे, असा पुनरुच्चार नातलगांसह सामाजिक कार्यकर्त्यांनी करून प्रकरणाची गंभीरतेने चौकशी करा, अशी मागणी केली.

सामाजिक कार्यकर्त्यांनी केलेल्या आवाहनानुसार (रविवारी) सायंकाळी कारापूर येथून मृत वासंती राहत होती त्या वादग्रस्त मालमत्तेपासून काढलेल्या या ‘मूक मशाल मोर्चा’त तीनशेपेक्षा अधिक लोकांचा सहभाग होता.

राजकीय दबावाचा बळी

वासंतीने मेमध्ये पोलिसांत तक्रार केली होती. न्यायासाठी तिने पणजीत उपोषणही केले होते. मात्र, उपोषण वा तक्रारीवर चौकशी झाली नाही. राजकीय दबावामुळे तिला न्याय मिळाला नाही, असा आरोप ‘गाकुवे’चे उपाध्यक्ष रामकृष्ण जल्मी,ॲड. अजय प्रभूगावकर, स्वप्नेश शेर्लेकर, अध्यक्ष प्रतीक्षा खलप, फिदोल परेरा आदींंनी केला.