पणजी: कला अकादमीच्या नूतनीकरणाच्या कामाचा अभ्यास करण्यासाठी नेमलेल्या कृती दलाच्या शिफारशीनुसार अकादमची १६ पासून तज्ज्ञ समिती पाहणी करणार आहे. त्या समितीचा अहवाल आल्यानंतरच अकादमी बंद ठेवायचा की नाही, याबाबत अंतिम निर्णय घेतला जाईल, असे अकादमीचे चेअरमन चंद्रकांत कवळेकर यांनी जाहीर केले.

मद्रास आयआयटीने अकादमीच्या नूतनीकरणाच्या कामांचा तपासणी अहवाल कृती दल व अकादमी व्यवस्थापनाला सादर केला आहे. त्या अहवालाच्या आधारावर टास्क फोर्सचे चेअरमन विजय केंकरे व सदस्यांनी काही दिवसांपूर्वी पत्रकार परिषद घेत कला अकादमीच्या नूतनीकरणाच्या कामात अनेक त्रुटी असल्याचे आयआयटी मद्रासच्या अहवालात नमूद केले आहे.

त्यामुळे सरकारने नियुक्त केलेल्या कार्यगटाने (टास्क फोर्स) दीनानाथ मंगेशकर सभागृहात सुधारणात्मक दुरुस्तीचे काम करण्यासाठी १ ऑगस्टपासून ते बंद ठेवण्याची शिफारस केली. हे काम साधारणपणे दोन ते तीन महिने चालण्याची शक्यता आहे.

त्यावर आता चेअरमन कवळेकर यांचे सुमारे सहा दिवसांनी टास्क फोर्सच्या शिफारशीवर स्पष्टीकरण दिले आहे. शिफारशीनुसार अकादमीच्या कामांची तपासणी तज्ज्ञ समिती उद्या ता. १६ पासून सुरू करणार आहे. समितीचा अहवाल आल्यानंतरच अकादमी व्यवस्थापन ती बंद ठेवायची की नाही, याबाबत निर्णय घेतला जाईल, असे कवळेकर यांनी नमूद केले आहे.