पणजी: खासगी कंपन्‍या, आस्‍थापनांमधील महिला कर्मचाऱ्यांसह कंपन्‍या, आस्‍थापनांकडे नोंदणी असलेले सर्व कामगार तसेच मनुष्‍यबळ विकास महामंडळ (जीएचआरडीसी) आणि राज्‍यात कंत्राटी पद्धतीवर कार्यरत केंद्रीय कर्मचारी यांना कदंब महामंडळातर्फे बस प्रवासात ५० टक्‍के सूट देण्‍यात येणार आहे.

कदंब महामंडळाकडून योजना अंतिम टप्‍प्‍यात आली असून, लवकरच सरकारकडून या योजनेची घोषणा करण्‍यात येणार आहे. या योजनेचा राज्‍यातील लाखो कामगारांना (Employees) फायदा मिळणार आहे. महामंडळाचे व्‍यवस्‍थापकीय संचालक रोहन कासकर यांच्‍याशी संपर्क साधला असता ते म्‍हणाले, पावसाळी अधिवेशनात मुख्‍यमंत्री डॉ. प्रमोद सावंत यांनी औद्योगिक वसाहतींमध्ये काम करणाऱ्या महिलांना बस प्रवासात ५० टक्‍के सूट देण्‍याची घोषणा केली होती.

चार स्‍तरांमधील कामगारांना कदंब (Kadamba) बसेससह सरकारच्‍या ‘माझी बस’ योजनेअंतर्गत ज्‍या बसेस सुरू आहेत, त्‍यातील प्रवासातही ५० टक्‍के सूट मिळणार आहे. या योजनेमुळे अधिकाधिक कामगार वर्ग कदंब बसच्‍या प्रवासाकडे वळून त्‍यांनाही प्रवासात सूट मिळेल. शिवाय कदंब महामंडळालाही आर्थिक फायदा होईल, असेही कासकर यांनी सांगितले.

या योजनेची प्रक्रिया अंतिम टप्‍प्‍यात पोहोचली असून, लवकरच योजनेची घोषणा करण्‍यात येईल. त्‍यानंतर या चारही विभागांतील कामगारांना कदंब महामंडळाकडून स्‍मार्ट कार्ड देण्‍यात येईल. त्‍याद्वारे त्‍यांना प्रवासात ५० टक्‍के सूट देण्‍यात येईल, असे कासकर म्हणाले.