नवी दिल्ली: अलाहाबाद उच्च न्यायालयाचे माजी न्या. यशवंत वर्मा यांच्या दिल्लीतील घरात मोठ्या प्रमाणात पैसा सापडला होता. हा पैसा त्यांचाच होता आणि यासंदर्भात त्यांनी दिलेले स्पष्टीकरण टाळाटाळ करणारे व समाधानकारक नव्हते, असा निष्कर्ष लोकसभेचे अध्यक्ष ओम बिर्ला यांनी स्थापन केलेल्या चौकशी समितीने काढला आहे.

समितीचा अहवाल संसदेच्या दोन्ही सभागृहांत आज सादर झाला. न्या. वर्मा यांच्या विरोधात करण्यात आलेल्या आरोपांत तथ्य असून बेहिशेबी पैसा सापडणे, महत्त्वाच्या साक्षी पुराव्यांत फेरफार करणे व तपासात टाळाटाळ करण्याबाबतचे त्यांच्यावरील आरोप योग्य असल्याचे चौकशी समितीने म्हटले आहे.

सर्वोच्च न्यायालयाचे तत्कालीन सरन्यायाधीश संजीव खन्ना यांच्या निर्देशावरून झालेल्या अंतर्गत चौकशीत न्या. वर्मा यांच्यावर प्रतिकूल ताशेरे ओढण्यात आले होते. त्यानंतर लोकसभेच्या अध्यक्षांनी न्यायाधीश तपास कायद्यान्वये न्या. वर्मा यांची चौकशी करण्यासाठी समितीची स्थापना केली होती.

अशी समिती स्थापन करण्याला विविध राजकीय पक्षांनी पाठिंबा दिला होता. तीन सदस्यांच्या समितीने दोन खंडामध्ये अहवाल संसदेत सादर केला आहे. त्यातील एका खंडामध्ये तोंडी व लेखी पुराव्यांचा समावेश आहे.

अहवालातील नोंद

सापडलेला पैसा जप्त करण्यात आला नाही अथवा त्याची मोजणी करण्यात आली नाही. घटनास्थळाचा पंचनामा किंवा पैशाचे नमुने सुरक्षित ठेवले नाहीत. असे असतानाही पैसा मोठ्या प्रमाणात होता, ही बाब सिद्ध होत असल्याचे चौकशी समितीने अहवालात म्हटले आहे.