ख्रिश्चन धर्मातील बीपीएल वृद्ध लोकांसाठी झारखंड राज्य सरकार तीर्थयात्रा आयोजित करणार आहे. पर्यटन, कला, संस्कृती आणि क्रीडा विभागाने मुख्यमंत्री तीर्थ दर्शन योजनेंतर्गत यावर्षी ऑक्टोबरच्या पहिल्या आठवड्यात वृद्धांना गोव्यात तीर्थयात्रेसाठी पाठवण्याचा निर्णय घेतला आहे.

या संदर्भात बीपीएल ज्येष्ठांकडून अर्ज मागविण्याची प्रक्रिया सुरू करण्यात आली आहे.

झारखंड टुरिझम डेव्हलपमेंट कॉर्पोरेशन लिमिटेडच्या वतीने बीपीएल श्रेणीतील लाभार्थी यात्रेकरूंना राज्यातील ख्रिश्चन अनुयायांसाठी विशेष ट्रेनने गोव्यात यात्रेला नेण्यात येणार आहे. राज्यभरातून 1000 लोकांना गोव्याला पाठवले जाणार आहे.

यात्रेसाठी यात्रेकरूचे वय 60 वर्षांच्या वरती तो झारखंड राज्याचा कायमचा रहिवासी असावा. यात्रेकरू हा बीपीएल श्रेणी अंतर्गत आला पाहिजे आणि करदाता नसावा. यात्रेकरूने या प्रकारच्या तीर्थ दर्शन योजनेचा लाभ यापूर्वी घेतलेला नसावा, फक्त अशा यात्रेकरूंना तीर्थक्षेत्रात पाठवले जाईल. असे सरकारने स्पष्ट केले आहे.

गोव्यातील ख्रिश्चन तीर्थक्षेत्रात सात ते दहा दिवसांची सहल आयोजित करण्यात येणार असल्याचे खात्यातर्फे सांगण्यात आले आहे. या यात्रेदरम्यान, लोक वेगवेगळ्या चर्चला भेट देतील. निवास व भोजनाची संपूर्ण व्यवस्था शासनाकडून केली जाणार. जिल्ह्यातून तीर्थक्षेत्र आणि परतीच्या प्रवासाचा खर्चही सरकार उचलणार आहे.

तीर्थ दर्शन योजनेचा लाभ घेण्यासाठी अर्जदाराला विहित नमुन्यात डुप्लिकेटमध्ये अर्ज करावा लागेल. मूळ वैद्यकीय प्रमाणपत्रासह 2 छायाचित्रांसह फिट फॉर ट्रॅव्हल सर्टिफिकेट जवळच्या गटविकास अधिकाऱ्याकडे सादर करावे लागेल. त्यानंतर जिल्हास्तरीय व्यवस्थापन समितीद्वारे यात्रेकरूंची निवड केली जाईल. 'प्रथम येणाऱ्यास प्राधान्य' या तत्त्वावर यात्रेकरूंची निवड केली जाणार आहे.