Goa Politics: लोकसभेच्या गोव्यातील दोन्ही जागा काँग्रेस लढवणार असल्याचे शनिवारी स्पष्ट झाले. इंडिया आघाडीचा घटक पक्ष म्हणून आम आदमी पक्ष आता काँग्रेसचे दोन्ही उमेदवार निवडून आणण्यासाठी प्रयत्न करेल, असे पक्षाचे राज्य निमंत्रक ॲड. अमित पालेकर यांनी शनिवारी​ सांगितले.

त्यामुळे खऱ्या अर्थाने आता काँग्रेस प्रदेशाध्यक्ष अमित पाटकर आणि ॲड. अमित पालेकर यांची या दोन्ही जागा जिंकून आणण्यासाठी कसोटी लागणार आहे.

करंझाळे येथे घेतलेल्या पत्रकार परिषदेत ते बोलत होते. यावेळी त्यांच्यासमवेत काँग्रेस प्रदेशाध्यक्ष अमित पाटकर उपस्थित होते. पालेकर म्हणाले की, आघाडीच्या वरिष्ठ नेत्यांनी दिल्लीतील बैठकीत गोव्यातील लोकसभेच्या दोन्ही जागा काँग्रेसला देण्याचा निर्णय घेतला. त्यानुसार ‘आप’ने काँग्रेसच्या दोन्ही उमेदवारांना पूर्ण पाठिंबा जाहीर केला आहे.

दरम्यान, गोवा फॉरवर्ड, मगोप या प्रादेशिक पक्षांसह तिन्ही अपक्ष आमदारांनीही ‘इंडिया’ आघाडीमध्ये सहभागी​ होणे आवश्यक आहे, असे मत काँग्रेस प्रदेशाध्यक्ष अमित पाटकर यांनी व्यक्त केले.

‘आरजी’चे पितळ उघड'

भाजपला हरविण्यासाठी लोकसभा निवडणूक लढवण्याचा दावा ‘आरजी’च्या अध्यक्षांनी केला होता. आम्ही त्यांना आघाडीत येण्याचे आमंत्रण दिले होते; परंतु त्यांनी आम्हाला टाळले, असे पालेकर म्हणाले

भ्रष्ट ‘कमळ' उखडून टाकू

राष्ट्रीय स्तरावर इंडिया आघाडीसाठी कॉंग्रेस आणि ‘आप’ने एकत्र येण्याचा निर्णय घेतला असून, आमदार, बुथ व्यवस्थापन, कार्यकर्त्यांना काँग्रेसबरोबर एकत्रितरित्या काम करावे लागेल,

असे सांगितले आहे. पालेकर व पाटकर यांनी पत्रकार परिषदेत ‘गोयंकार हातात झाडू घेऊन भ्रष्ट कमळ उखडून टाकणार असल्याचे जाहीर केले.