पणजी : खलाशांच्या राष्ट्रीय संघटनेकडून 50 लाख रुपयांची विमा योजना लॉन्च करण्यात आली आहे. सध्या कार्यरत असलेल्या 55 वर्षांपर्यंतच्या खलाशांना याचा थेट लाभ मिळणार आहे. महासंचालक अमिताभ कुमार यांनी नुकतीच NUSI सुरक्षा कवच नावाची विमा योजना लॉन्च केली आहे. एलआयसीच्या माध्यमातून ही विमा योजना लागू करण्यात आली आहे. (Seaferer in goa will get insurance cover of 50 lacs News Updates)

जर एखाद्या खलाशाने एलआयसीची (LIC) जीवन अमर पॉलिसी घेतली तर त्याच्या कुटुंबाला नैसर्गिक मृत्यूनंतरही 25 लाख रुपयांची भरपाई मिळेल, अपघाती मृत्यूनंतर 50 लाखांची तरतूद या पॉलिसीमध्ये करण्यात आली आहे. 55 वर्षांखालील खलाशी कमीत कमी 10 वर्षांसाठी विमा पॉलिसी घेऊ शकतात. यातील अर्धा हिस्सा NUSI संघटना खलाशाच्या वयाच्या 60 व्या वर्षापर्यंत भरणार असल्याची माहिती संघटनेकडून देण्यात आली आहे. संघटनेचा कोणताही सक्रीय सभासद ज्याला मागील 5 वर्षात किमान 24 महिन्यांचा अनुभव आहे, तो सभासद विम्यासाठी (Insurance) पात्र ठरणार आहे.

खलाशांना पॉलिसीचा लाभ तेव्हाच मिळणार आहे, जेव्हा ती जहाजावर ड्युटी बजावत असतील. सुट्टीवर असताना झालेल्या मृत्यू (Death) किंवा दुखापतीसाठी कोणतीही तरतूद या पॉलिसीमध्ये करण्यात आलेली नाही. मात्र संघटनेकडून या तरतुदीसाठीही प्रयत्न सुरु असल्याची माहिती देण्यात आली आहे. संघटनेच्या 125 व्या वर्षपूर्तीनिमित्त हे खलाशांना गिफ्ट असल्याची माहितीही पदाधिकाऱ्यांनी दिली आहे.