मुंबई-गोवा महामार्गावर (Mumbai-Goa Highway) वाहनाच्या धडकेत गवा ठार झाला आहे. ओसरगाव, कणकवली (Osargao, Kankavli) येथी मंगळवारी रात्री 12.15 वा. हा अपघात झाला. अपघातानंतर वाहन चालक वाहनासह फरार झाला. बराचकाळ मृत गवा रस्त्यात पडल्याने वाहतूक कोंडी झाली होती.

मिळालेल्या माहितीनुसार, मंगळवारी रात्री झालेल्या अपघातानंतर स्थानिकांनी वन विभागाला याबाबत माहिती दिली. वन विभागाचे कर्मचारी आणि वाहतूक पोलीस घटनास्थळी दाखल झाले. वाहतूक पोलिसांच्या मदतीने मृत गव्याला बाजूला करून वाहतूक पूर्ववत करण्यात आली. जेसीबीच्या सहाय्याने मृत गव्याला ट्रॅक्टरमध्ये भरून पशुवैद्यकीय अधिकाऱ्यांच्या उपस्थितीत त्याचे दहन करण्यात आले.

दरम्यान, यापूर्वी गव्याचे शवविच्छेदन करण्यात आले. तसेच, याप्रकरणी वन विभागाने अज्ञात वाहन चालकाविरोधात गुन्हा देखील दाखल केला आहे.