IBW cancelled in Goa: गोव्यातील पर्यटन आणि लाईफस्टाईल इव्हेंट्ससाठी सर्वात महत्त्वाचा मानला जाणारा 'इंडिया बाईक वीक' (IBW) यंदा गोव्यात होणार नाही. आयोजकांनी १२ व्या आवृत्तीसाठी गोव्याला अचानक फाटा दिला असून, हा कार्यक्रम आता १९-२० डिसेंबर रोजी पाचगणी येथे आयोजित करण्याची घोषणा केली आहे.

हा सोहळा पूर्वी १२-१३ डिसेंबर रोजी गोव्यातील व्हागातोर येथे नियोजित होता. पण, राज्यात जिल्हा परिषद निवडणुका जाहीर झाल्याने सुरुवातीला त्याची तारीख बदलून १९-२० डिसेंबर करण्यात आली होती. मात्र, आता आयोजकांनी केवळ तारीखच नव्हे, तर ठिकाणही बदलल्याने गोव्याच्या पर्यटन आणि इव्हेंट वर्तुळात मोठी खळबळ माजली आहे.

'सनबर्न'चा कित्ता की निवडणुकीचा परिणाम?

IBW ने अचानक गोवा सोडल्यामुळे गोव्याच्या पर्यटन क्षेत्रात अनेक मोठे प्रश्नचिन्ह उभे राहिले आहेत. या स्थलांतरामागे केवळ जि. प. निवडणुकीच्या तारखांमधील बदल हे तात्पुरते कारण आहे की, 'सनबर्न' महोत्सवाने काही वर्षांपूर्वी गोव्यातून स्थलांतर केले होते, तसाच IBW देखील कायमस्वरूपी गोव्यातून बाहेर पडत आहे का, यावर चर्चा सुरू झाली आहे.

'सनबर्न' हा एक प्रमुख संगीत महोत्सवही काही वर्षांपूर्वी गोव्यातून हलवण्यात आला होता. आता IBW गोव्यातून बाहेर पडल्यामुळे, मोठे सांस्कृतिक आणि लाईफस्टाईल इव्हेंट्स आयोजित करण्यासाठी गोवा पूर्वीप्रमाणे 'प्रीमियर डेस्टिनेशन' म्हणून आपली ओळख गमावत आहे का, अशी तीव्र चिंता पर्यटन उद्योगातील व्यावसायिकांनी व्यक्त केली आहे.