Goa Corona Update: एकीकडे देशात H3N2 विषाणुचे रूग्ण वाढत चालले असताना आता कोरोना देखील डोके वर काढू लागला आहे. गोव्यात हळूहळू कोरोना रूग्णसंख्येत वाढ होऊ लागली आहे.

राज्यात गेल्या २४ तासात तब्बल 11 नवे कोरोनारूग्ण आढळून आले आहे. विशेष म्हणजे, पाच दिवसांपुर्वीच म्हणजे 10 मार्च रोजी गोव्यात 24 तासात कोरोनाचे नवीन 8 रूग्ण आढळून आले होते.

गोव्यात नव्याने आढळलेल्या या 11 नव्या रूग्णांमुळे राज्यातील सक्रिय कोरोनारूग्णसंख्या आता 48 वर गेली आहे. या नव्या 11 जणांना होम आयसोलेशनमध्ये ठेवले आहे. दरम्यान, गेल्या चोवीस तासात 3 रूग्ण कोरोनामुक्त झाले आहेत.

गोव्यात गेल्या 24 तासात 312 नव्या चाचण्या झाल्या आहेत. तर कोरोनामुळे एकाही मृत्यूची नोंद झालेली नाही. गोव्याचा कोरोनामुक्ती दर 98.43 टक्के इतका आहे.

गोव्यात आत्तापर्यंत 21 लाख 53 हजार 727 एकुण चाचण्या झाल्या आहेत. एकुण 2 लाख 59 हजार 210 रूग्ण आढळून आले होते, त्यातील 2 लाख 55 हजार 149 जण कोरोनामुक्त झाले आहेत. तर आत्तापर्यंत 4013 कोरोनारूग्णांचा मृत्यू झाला आहे.