पणजी : श्रावण असल्यामुळे गोव्यातील भाजी दुकानांमध्ये हिरव्या भाज्यांची झपाट्याने विक्री होत आहे. दररोज 80 टन भाज्यांच्या विक्रीच्या तुलनेत, गोवा स्टेट हॉर्टिकल्चर कॉर्पोरेशन लिमिटेड (GSHCL) च्या आउटलेटमध्ये दिवसाला 100 ते 110 टन हिरव्या भाज्यांची विक्री होत आहे.

(Increase in sales of vegetables in Goa due to Shravana)

GSHCL चे व्यवस्थापकीय संचालक चंद्रहास देसाई म्हणाले की, “सणासुदीच्या हंगामामुळे खरेदीदार नेहमीपेक्षा जास्त भाज्यांची खरेदी करत असल्याने दररोज 20-25 टन विक्रीत वाढ झाली आहे.

गोव्यातील हिंदू सहसा श्रावण महिन्यात शाकाहारी आहार घेतात. अनुदानित दरात मिळणारे टोमॅटो आणि कांदे या दुकानांवर उर्वरित भाज्यांच्या तुलनेत वेगाने विकले जात आहेत. महिन्याची सांगता गणेश चतुर्थीच्या उत्सवाने होणार असून भाजी खरेदीचे प्रमाण वाढले आहे.

“प्रत्येक दिवसाची ऑर्डर एक दिवस आधी दिली जाते आणि त्यानुसार पुरवठादार आम्हाला भाज्या पाठवतात. त्यामुळे वाढीव प्रमाणात हिरव्या भाज्या घेण्यास कोणताही अडथळा नाही. यापैकी जास्त करून भाजीपाला बेळगावहून येतो आणि आमचे पुरवठादार मागणीनुसार पुरवठा करण्यास सक्षम आहेत.

पुरवठादारांना मागणी पूर्ण होण्यासाठी हवामानही अनुकूल आहे. काही विक्रेते प्रामुख्याने स्थानिक उत्पादकांकडून भाजीपाला घेतात ज्यामुळे हिरव्या भाज्या ताज्यातवान्या मिळतात.”