निवृत्ती शिरोडकर

मांद्रे: मांद्रे मतदारसंघातील 1963 ते 2022 या विधानसभेच्या निवडणुकीत आतापर्यंत मगो पक्षाच्या उमेदवारीवर निवडून आलेले आमदार हे मतदारसंघाबाहेरील आहेत. स्थानिक उमेदवारांना आमदार बनण्याची संधी अजूनली मिळाली नसल्याने ते आमदार बनण्यापासूनच दूर राहिले आहेत.

या मतदारसंघातून निवडून आला, तो आमदार, मंत्री झाल्यानंतर पुन्हा कधीच निवडून आला नाही. सध्या मगोच्या उमेदवारीवर निवडून आलेले जीत आरोलकर हेही मूळ मतदारसंघातील नसून, ते आरोबा या ठिकाणचे आहेत. सध्या ते मांद्रे मतदारसंघात वास्तव्य करून आहेत. त्यामुळे ते स्थायिक आहेत, स्थानिक नव्हे.

1963 साली पहिल्यांदा विजय कामूलकर मगो पक्षाच्या उमेदवारीवर निवडून आले, ते कोरगाव भागातील होते. 1967 ॲन्थोनी डिसोझा निवडून आले. ते साखळीतील होते तर 1972 साली भाऊसाहेब बांदोडकर निवडून आले तेही पणजी भागात राहत होते. 14 फेब्रुवारी रोजी भाऊसाहेब बांदोडकर यांचे निधन झाल्यानंतर 1974 साली पोटनिवडणूक झाली आणि त्या पोट निवडणुकीत म्हापशातील रमाकांत खलप निवडून आले. त्यानंतर 1977, 1980, 1984, 1989 तसेच सलग पाच वेळा निवडून आल्यानंतर त्यांना 1994 च्या निवडणुकीत पराभवाचा सामना करावा लागला.

त्या निवडणुकीत काँग्रेसच्या संगीता परब निवडून आल्या. पुन्हा 1999 साली रमाकांत खलप मगो पक्षाच्या उमेदवारीवर निवडून आले. त्यानंतर 2002, 2007 आणि 2012 च्या निवडणुकीत भाजपचे प्राचार्य लक्ष्मीकांत पार्सेकर विजयी ठरले. तर 2017च्या निवडणुकीत काँग्रेसचे दयानंद सोपटे आमदार म्हणून निवडून आले. त्यानंतर 2019 च्या पोट निवडणुकीत भाजपच्या उमेदवारीवर सोपटे निवडून आले. 2022 च्या निवडणुकीत मात्र तब्बल 22 वर्षांनंतर मगो पक्षाच्या उमेदवारीवर युवा जित आरोलकर हे आमदार म्हणून विजयी झालेले आहेत.

मगो पक्षाने आतापर्यंत जे जे उमेदवार दिले ते उमेदवार आमदार म्हणून निवडून आले आहेत ते मांद्रे मतदारसंघातील नव्हेत. आताही आरोलकर हे मूळ आरोबा धारगळ गावातील आहेत. परंतु त्यांनी मागच्या पाच वर्षापूर्वी आपली कारकीर्द मांद्रे मतदारसंघात सुरू करत असताना त्यांनी आपले वास्तव्य मांद्रे मतदारसंघात केलेले आहे. त्यामुळे ते स्थानिक की स्थायिक हा मुद्दा जरी महत्त्वाचा नसला तरी इतिहास पाहताना मगो पक्षाचे आमदार हे मांद्रे मतदारसंघाबाहेरील आहेत.