Goa Water Supply Pipelines: रस्ते बांधकाम किंवा ड्रेनेजच्या कामावेळी अनेक पाईपलाईन फुटत असतात. गोव्यात असे प्रकार घडलेले आहेत. यावेळी या फुटलेल्या पाईप बदलून त्याठिकाणी नवीन पीव्हीसी पाईपलाईन बसवल्या जातात.

अशा प्रकारे राज्यात आत्तापर्यंत केवळ दहा ते पंधरा टक्केच पाईपलाईन बदलण्यात आल्या आहेत, अशी माहिती समोर आली आहे.

सार्वजनिक बांधकाम विभागाचे मुख्य अभियंता उत्तम पार्सेकर यांच्या हवाल्याने टाईम्स ऑफ इंडियाने याबाबतचे वृत्त दिले आहे. त्यांनी म्हटले आहे की, गोव्यात 90 टक्के जुन्या पाईपलाईन आहेत. केवळ दहा ते पंधरा टक्केच पाईप्स बदलल्या आहेत.

राज्यातील पाणीपुरवठा करणाऱ्या पाईपलाईन्सची लांबी सुमारे 1300 किलोमीटर इतकी आहे. जेव्हा या पाईपलाईन्समध्ये बिघाड होतो तेव्हा जुन्या एसी पाईपलाईन बदलून त्याठिकाणी नवीन पीव्हीसी पाईपलाईन्स बसवल्या जातात.

पाणी पुरवठा थांबवून या पाईपलाईन्स बदलणे शक्य नाही. आत्तापर्यंत सुमारे 10 ते 15 टक्के पाइपलाइन बदलण्यात आल्या आहेत.

गोव्यात जुन्या पाईपलाईन्समुळे जवळपास 38 टक्के पाणी वाया जाते, अशी माहितीही त्यांनी दिली. गोव्यातील पाणीपुरवठ्याच्या सर्व लाईन्स बदलून त्याठिकाणी नवीन पाईपलाईन टाकण्यासाठी राज्य सरकार प्रयत्न करत आहे.

त्यासाठी केंद्र सरकारच्या मदतीची गरज असणार आहे. या संपूर्ण कामासाठी सुमारे 300 कोटी रूपयांहून अधिक खर्च येणार आहे.

दरम्यान, हर घर जल या मिशन अंतर्गत राज्यातील घरांना 100 टक्के पाणीपुरवठा जोडणी मिळवून देणारे गोवा हे देशातील पहिले राज्य ठरले आहे. असे असतानाही गोव्याला राज्याच्या मागणीच्या तुलनेत प्रक्रिया केलेल्या सुमारे 85 एमएलडी पाण्याचा तुटवडा जाणवत असल्याचे सांगितले जात आहे.