पणजी: गोव्यात येत्या शुक्रवारी (१५ नोव्हेंबर) वादळी वाऱ्यासह पावसाची शक्यता हवामान खात्याने वर्तवली आहे. वेधशाळेने यलो अलर्ट जारी केला असून, या दिवशी वादळी वाऱ्यासह, वीजांचा कडकडाट आणि ३०-४० प्रतितास वेगाने वारे वाहण्याची शक्यता वर्तवली आहे. उकाड्याने हैरान झालेल्या गोमंतकीयांना काहीसा दिलासा मिळण्याची शक्यता आहे.

नोव्हेंबर सुरु झाल्यापासून राज्यात कोरोडे हवामान पाहायला मिळत आहे. पहाटे जाणवणारी हलकी थंडी सकाळी नऊपर्यंत गायब होते. दिवसभर मात्र गोमंतकीयांना प्रचंड उकाड्याचा त्रास सहन करावा लागतो.

सोमवारी राजधानी पणजीत ३४ अंश सेल्सियस तापमानाची नोंद झाली. तर, राज्यात २३ अंश सेल्सियस कमाल तापमान नोंदवले गेले. हवामान खात्याने प्रसिद्ध केलेल्या माहितीनुसार, पणजीतील हवेत ५९ टक्के आद्रता नोंदवण्यात आली.

गेल्या दहा दिवसांत राज्यात तुरळक ठिकाणी किरकोळ पावसाची नोंद झाली. पण, सामान्यत: राज्यातील तापमान कोरडे पाहायला मिळाले. गेल्या चोवीस तासांत राज्यात कोठेच पावसाची नोंद झालेली नाही.

नोव्हेंबरपासून राज्यातील तापमानात वाढ झाल्याचे पाहायला मिळत असून, नागरिकांचे गर्मीने हाल होतायेत. दरम्यान, पावसाच्या शक्यतेमुळे गर्मीने त्रस्त नागरिकांना काहीसा दिलासा मिळण्याची शक्यता आहे.

दरम्यान, हवामान खात्याने १२ ते १४ नोव्हेंबर या काळात राज्यात हवामान कोरडे राहण्याची शक्यता वर्तवली आहे.