Goa Illegal Liquor Seized: गोवा बनावटीच्या मद्याची बेकायदा तस्करी करणाऱ्या दोघांना गोव्याच्या अबकारी खात्याच्या पथकाने अटक केली आहे. कणकुंबी तपास नाक्यावर ही कारवाई करण्यात आली. अटक झालेल्या दोघांकडून सुमारे 78 हजार रूपये किंमतीची दारू जप्त करण्यात आली आहे.

दोघेही संशयित मूळचे आसामचे आहेत. महाराष्ट्रात नोंद असलेल्या ट्रकमधून ही तस्करी केली जात होती. हा ट्रकही जप्त करण्यात आला आहे.

दरम्यान, अनमोड तपास नाक्यावरही अशाच पद्धतीची कारवाई करण्यात आली आहे. गोव्यातून कर्नाटकात जाणाऱ्या एका लक्झरी प्रवासी बस (KA01-AJ 2561) मधून गोवा बनावटीच्या मद्याची तस्करी केली जात होती. ही बस गोव्याहून मंगळूर येथे जात होती. या बसमधून 329 लिटर दारु जप्त करण्यात आली आहे. लक्झरी बसही जप्त करण्यात आली आहे. वाहनासह एकुण मुद्देमालाची किंमत 34 लाख 32 हजार सहाशे 10 रूपये इतकी आहे. या प्रकरणी तिघांना अटक करण्यात आली आहे.