म्हापसा: पर्यटकांच्या सुरक्षेला धाब्यावर बसवून बागा परिसरात सध्या बेकायदा ‘कयाकिंग’ व्यवसाय सुरू असल्याचा धक्कादायक प्रकार उघडकीस आल्याचा दावा करण्यात आला आहे.

कोणतीही परवानगी नसताना हा वॉटर स्पोर्ट्स व्यवसाय बिनदिक्कतपणे सुरू असल्याने, याला स्थानिक पोलिस तसेच सरकारी यंत्रणांचा छुपा वरदहस्त असल्याचा संशय व्यक्त केला जात आहे. हळदोण्याचे आमदार ॲड. कार्लुस फेरेरा यांनी याला तीव्र आक्षेप घेत संबंधित ऑपरेटरवर त्वरित कठोर कारवाई करण्याची मागणी केली आहे.

पावसाळ्याच्या दिवसांत समुद्रातील वाढत्या धोक्यामुळे मासेमारीसह सर्व प्रकारच्या वॉटर स्पोर्ट्सवर अधिकृतपणे पूर्ण बंदी घालण्यात आली आहे. असे असतानाही बागा परिसरात नियम धाब्यावर बसवून हे धोकादायक खेळ सुरू असल्याचा आरोप करण्यात आला आहे.

मान्सून काळात समुद्राला उधाण आलेले असताना प्रशासनाच्या नाकाखाली सुरू असलेल्या या प्रकारामुळे पर्यटकांच्या सुरक्षेचा प्रश्न पुन्हा एकदा ऐरणीवर आला आहे.

फेरेरा म्हणाले, ‘‘पावसाळ्यात वॉटर स्पोर्ट्स ॲक्टिव्हिटी बंद असते; पण बागा परिसरात उघडपणे कयाकिंग सुरू आहे. याचाच अर्थ कोणीतरी कथित हप्ता घेत आहे. म्हणूनच अशा प्रकारे बेकायदेशीरपणे हे खेळ सुरू आहेत. या प्रकरणाची चौकशी झालीच पाहिजे.’’

ऑपरेटरवर त्वरित कारवाई करा : फेरेरा

शासकीय बंदी असतानाही पर्यटकांच्या जिवाशी खेळणारे हे बेकायदेशीर उद्योग कोणाच्याही भीतीशिवाय राजरोसपणे सुरू आहेत. यामुळे पर्यटकांचा जीव धोक्यात आला असून प्रशासनाने यावर तात्काळ कारवाई केली पाहिजे, अशी आग्रही मागणी आमदार कार्लुस फेरेरा यांनी केली आहे.