वाळपई: कोपार्डे-सत्तरी येथे खान नामक व्यक्तीच्या खासगी जमिनीत बेकायदेशीररित्या गेल्या अनेक दिवसांपासून टाकाऊ चिकन सातत्याने उघड्यावर टाकण्याचा प्रकार घडत आहे. या कचऱ्यामुळे या परिसरात घाणीचे सम्राज्य पसरले आहे. अनेकदा यासंबंधी ग्रामस्थांनी जमीन मालकाला सांगूनही खुलेआम हा प्रकार घडत आहे.

शनिवारी रात्री ११ च्या सुमारास एक टेम्पो कचरा टाकण्यासाठी आला असता ग्रामस्थांनी अडवला. त्यावेळी ग्रामस्थ आणि चालक यांच्यात बाचाबाची झाली. टाकाऊ चिकन टाकले जात असल्याने त्याचा त्रास लोकांना होत आहे. अनेकदा ग्रामस्थांनी पंचायतीकडे यासंबंधी तक्रारही केली आहे. मात्र कोणीच यावर कारवाई केली नाही.

मिळालेल्या माहिती नुसार पिसुर्ले सत्तरी येथील कचरा प्रकल्पात सदरचा कचरा देण्यात येतो. मात्र गेल्या काही काळापासून हा प्रकल्प बंद आहे. त्यामुळे खान यांनी आपल्या खासगी जागेत वेस्ट टाकण्याचे काम सुरू केले आहे. काल पकडलेली गाडीही मडगावची आहे. त्यामुळे हा खान गोव्यातील अनेकांना या परिसरात बेकायदेशीर रित्या डम्पिंग करण्यास मुभा देतो, असे निदर्शनात आले आहे.

या प्रकरणाची सखोल चौकशी होऊन बेकायदतेशीर डंम्पिंग करणाऱ्यांवर कारवाई झाली पाहिजे अशी मागणी ग्रामस्थांनी केली आहे. या प्रकरणाचा तपास वाळपई पोलिस निरिक्षक विदेश शिरोडकर यांच्या मार्गदर्शनाखाली उपनिरिक्षक प्रथमेश गावस पुढील तपास करत आहे.

अन्य जनावरांचाही टाकाऊ कचरा

रात्री झालेल्या प्रकारानंतर ग्रामस्थांनी पोलिसांकडे कठोर कारवाईची मागणी केल्यानंतर, घटनास्थळी पोलिसांनी भेट देऊन पाहणी केली. तसेच कचरा भरलेली गाडी होंडा येथे नेऊन परत कोपार्डे येथे आणली. वाहनात भरलेला कचरा चिकनचा आहे का, किंवा इतर हे पाहण्याची मागणी ग्रमस्थांनी केल्यानंतर कोपार्डे येथे वाहनातील कचरा खाली करण्यात आला. त्यात इतर जनावरांचाही टाकाऊ कचरा असल्याचे समजले. त्यात मृत वासरुही आढळल्याचे समजते. या प्रकरणी पशुवैद्यकीय अधिकाऱ्यांनी घटनास्थळी भेट देऊन पाहणी केली असून उद्याप अहवाल मिळालेला नाही.