पणजी: राज्यात सध्या इफ्फीच्या उद्घटनाची सगळेच सिनेमाप्रेमी अगदी आतुरतेने वाट पाहत आहेत. बुधवारी संध्याकाळी 5-5:30च्या सुमारास इफ्फीचे उद्घाटन होईल आणि यानंतर सलग आठ दिवसांसाठी आंतराष्ट्रीय चित्रपट महोत्सव देश-विदेशातील चित्रपट प्रेमींसाठी खुला असेल. यंदाचा हा चित्रपट महोत्सव सोहळा बराच आकर्षक आणि खास होणार असून यंदाच्या वर्षी इफ्फीमध्ये इफ्फीएस्टा हा कार्यक्रम देखील सादर केला जाणार आहे.

इफ्फीएस्टाच्या माध्यमातून कला, संस्कृती आणि करमणूक यांचे संमिश्रण पाहायला मिळेल, तसेच या कार्यक्रमाचा भाग बनून प्रेक्षक सिनेमा आणि संगीत यांची आगळीवेळी मजा लुटू शकणार आहेत.

कला अकादमीमध्ये होणाऱ्या या कार्यक्रमात संगीतप्रेमींना एक अनोखा अनुभव घेण्याची संधी मिळेल. या महोत्सवात देशभरातून येणाऱ्या कलाकारांचे प्रादेशिक, पारंपारिक आणि सांस्कृतिक कार्यक्रम सादर केले जाणार आहेत, यामधून भारताची सांस्कृतिक विविधता आंतराष्ट्रीय स्थरावर सदर होईल. 2004 पासून इफ्फी आणि गोव्याचं नातं बरंच पक्कं झालंय आणि यंदाच्यावर्षी देखील मोठया प्रमाणात प्रेक्षक या चित्रपट महोत्सवाला भेट देतील अशा चर्चा केल्या जातायत.

तिकिटासाठी रांगेत उभं राहण्याची गरज नाही..

इफ्फीच्या आयोजकांकडून विविध भागांमधून येणाऱ्या डेलिगेट्ससाठी एक खास आणि मोठी घोषणा करण्यात आलीये. तुम्हाला जर का एखाद्या चित्रपटाच्या प्रदर्शनाचा आस्वाद घ्यायचा असेल तर तुम्ही ऑनलाईन तिकीट बुक करू शकता. आयोजन समितीने दिलेल्या माहितीनुसार प्रेक्षक इफ्फीच्या वेबसाईटवरून किंवा मोबाईल ऍपवरून चित्रपटांचं बुकिंग करू शकतील, मात्र यासाठी तुम्हाला किमान एक दिवस आधी बुकिंग करणं अनिवार्य असणार आहे.