ICC Championship Betting Raid Goa Pilerne

पणजी: सध्या सुरू असलेल्या आयसीसी चॅम्पियनशिप स्पर्धेसाठीच्या सट्टेबाजीसाठी गोवा हे सुरक्षित स्थळ म्हणून निवडण्यात येते. त्यामुळे विविध राज्यांतून काही सट्टेबाज गोव्यात दाखल झाले असून ते भाडेपट्टीवर फ्लॅट व काही बंगले घेऊन आहेत. ही स्पर्धा सुरू झाल्यापासून पोलिसांनी सट्टेबाजांवर नजर ठेवली आहे. काल रात्री पिळर्ण येथील एका बंगल्यावर धडक कारवाई करत तिघांना अटक केली आहे.

या कारवाईवेळी मोबाईल व लॅपटॉपसह सुमारे १.१० लाखांचे साहित्य जप्त केले आहे, अशी माहिती पर्वरी पोलिस निरीक्षक राहुल परब यांनी दिली. पोलिसांनी मकसुद मोदान (२८, बोताड-गुजरात), आसिफभाई जियाउद्दीनभाई (२५, बोताड-गुजरात) आणि रिझवान बाश (२०, राजकोट-गुजरात) यांना अटक केली आहे. पिळर्ण येथील एका बंगल्यात चॅम्पियन्स ट्रॉफीतील भारत वि. बांगलादेश सामन्यावर सट्टा लावला जात असल्याची गोपनीय माहिती मिळाली होती.

त्यानुसार ही कारवाई करत सट्टेबाजी ऑनलाईन पद्धतीने करताना त्यांना रंगेहात पकडण्यात आले. या कारवाईत ४ मोबाईल, १ लॉपटॉप, इंटरनेट राऊटर्स इत्यादी साहित्य जप्त करण्यात आले. याप्रकरणी उत्तर गोवा अधीक्षक अक्षत कौशल, पर्वरीचे उपअधीक्षक विश्वेश कर्पे यांच्या मार्गदर्शनाखाली व पर्वरी पोलिस स्थानकाचे निरीक्षक राहुल परब यांच्या नेतृत्वाखाली पर्वरी पोलिस पुढील तपास करत आहेत.

सट्टेबाजीचे प्रकार गोव्यात!

देशात किंवा परदेशात क्रिकेट स्पर्धा सुरू झाल्यावर सट्टेबाजीचे प्रकार सर्रास गोव्यात सुरू होतात. त्यासाठी राज्याबाहेरील सट्टेबाज अगोदरच येऊन भाडेपट्टीवर फ्लॅट किंवा बंगले घेऊन राहतात. अनेकदा फ्लॅट किंवा बंगल्यामध्ये काय चालले आहे याचा थांगपत्ताही लागत नाही. अशावेळी पोलिसांच्या गुप्तचर यंत्रणेमार्फत अशा सट्टेबाजांची माहिती मिळवण्यासाठी पोलिस तैनात करण्यात आलेले आहेत. काही दिवसांपूर्वी म्हापसा येथे पोलिसांनी कारवाई केली होती.