Calangute Sarpanch Joseph Sequeira: कळंगुटमध्ये शिवाजी महाराजांचा पुतळा उभारण्यावरून झालेल्या वादानंतर येथील सरपंच जोसेफ सिक्वेरा यांनी आता आपली भूमिका स्पष्ट केली आहे. शुक्रवारी प्रसारमाध्यमांसमोर सिक्वेरा यांनी आपले म्हणणे मांडले.

यावेळी बोलताना सिक्वेरा म्हणाले की, मी पण शिवप्रेमीच आहे. मी 30 वर्षांपासून पंचायतीच्या राजकारणात आहे. पण धर्माच्या आधारे कधीही कुठल्याही धर्माबाबत भेदभाव केलेला नाही. मी शाळेत मराठी विषय शिकलो आहे. उलट फ्रेंच भाषा टाळून मी मराठी विषय घेतला होता. काही प्रसारमाध्यमांनी आणि काही लोकांनी जाणीवपूर्वक शिवप्रेमींना भडकावण्याचा प्रयत्न केला.

जिथे शिवाजी महाराजांचा पुतळा उभारण्यात आला आहे तो भाग अपघात प्रवण क्षेत्र आहे. त्यामुळे या रस्त्यातील त्या आयलंडमधून पुतळा हटविण्याबाबतचा निर्णय पंचायतीने एकमताने घेतला होता. पुतळा उद्धस्त करा किंवा नष्ट करा, असे आम्ही कधीही म्हटलेले नाही, असे स्पष्टीकरणही सिक्वेरा यांनी दिले.

सिक्वेरा म्हणाले की, परवाचा जो प्रकार होता तो काही जणांनी केलेला पब्लिसिटी स्टंट होता. जाणीवपुर्वक या वादाला हिंदू विरूद्ध कॅथलिक बनविण्याचा प्रयत्न काही लोकांनी केला. कळंगुटमध्ये शांतादुर्गा मंदीर आहे, बीचजवळ साईबाबा मंदीर आहे.

तिथे आम्ही कधी विरोधाचा प्रयत्न केला का? उलट आम्ही परवाने दिले. त्यामुळे कुणीही दोन धर्मांत असा वाद निर्माण करण्याचा प्रयत्न करू नये.

ते म्हणाले, आम्ही पुतळा दहा दिवसात हटवा, असे म्हटले होते. खरे तर मुदत सात दिवसांचीच दिली जाते. पण संबंधित गटाने येऊन चर्चा करायची होती. आम्ही सुप्रीम कोर्टाच्या हवाल्याने निर्देश दिले होते. पण लोकांना मुद्दाम भडकावण्यात आला.

मला व्हिलन ठरविण्याचा प्रयत्न केला गेला. 30 वर्षे राजकारणात आहे, पण कधी कुणाचे वाईट केले नाही. मी कायद्याने वागणारा माणूस आहे. उच्च ऑथरिटी या निर्णयाला स्थगिती देऊ शकते, असेही सिक्वेरा म्हणाले.