पणजी: हैदराबादमधील अमली पदार्थ तस्करी प्रकरणात फरार असलेला कस्टोडिओ फर्नांडिस ऊर्फ क्रिस्टी याला तेलंगणातील ईगल फोर्सने गोव्यातून अटक केली. हैदराबाद शहर पोलिस आणि पंजागुट्टा पोलिसांच्या समन्वयातून ही कारवाई करण्यात आली. हैदराबाद पोलिसांनी त्यांच्या अधिकृत समाजमाध्यम खात्यावरून ही माहिती दिली.

या प्रकरणात ४८.४ लाख रुपयांच्या बँक व्यवहारांची तपासणी सुरू आहे. तेलंगणातील २५ हून अधिक रहिवाशांचा ऑनलाइन अमली पदार्थ खरेदी-विक्रीच्या कथित जाळ्याशी संबंध आहे का, याचीही पडताळणी केली जात आहे. तपास यंत्रणांच्या संशयानुसार, फर्नांडिसशी संबंधित व्यक्ती हैदराबादमधील ग्राहकांना अमली पदार्थ पुरवत असत.

त्यांच्याकडून रोख रक्कम गोळा करून ती एटीएमद्वारे फर्नांडिसशी संबंधित बँक खात्यांत जमा केली जात असल्याचा संशय आहे. गोवा, बंगळूर, मुंबई, नवी दिल्ली आणि अन्य ठिकाणांहून कार्यरत असल्याचा संशय असलेल्या आंतरराज्यीय अमली पदार्थ पुरवठादारांचाही तपास सुरू आहे.

रक्कम एटीएमद्वारे खात्यांत होतेय जमा

हैदराबादमधील ऑनलाइन अमलीपदार्थ खरेदी-विक्रीच्या कथित जाळ्याशी तेलंगणातील २५ हून अधिक रहिवाशांचा संबंध आहे का, याची तपास यंत्रणा पडताळणी करत आहे. अमलीपदार्थांच्या विक्रीतून मिळालेली रक्कम एटीएमद्वारे आरोपीशी संबंधित खात्यांत जमा केली जात असल्याचा संशय आहे. गोवा, बंगळूर, मुंबई, नवी दिल्लीसह विविध ठिकाणांहून कार्यरत असल्याचा संशय असलेल्या पुरवठादारांचाही तपास सुरू आहे.