चार वर्षीय मुलाच्या खून प्रकरणात अटकेत असलेल्या संशयित सूचना सेठचा पती गोव्यात दाखल झाला आहे. पती व्यंकटरमण शनिवारी (दि.13) आपल्या वकिलासोबत कळंगुट पोलीस स्थानकात हजर झाला. काही दिवसांपूर्वी पोलिसांनी त्याला चौकशीसाठी समन्स बजावले होते.

सूचना सेठचा पती गोव्यात दाखल झाल्यानंतर आता या खूनप्रकरणात कोणते नवीन खुलासे समोर येणार हे पाहणं महत्वाचे ठरणार आहे. व्यंकटरमण दुपारी कळंगुट पोलीस स्थानकात हजर झाल्यानंतर त्याने प्रसार माध्यमांसोबत संवाद साधण्यास नकार दिला.

सूचनाने यापूर्वी चौकशीत पतीसोबत तणापूर्व संबंध असल्याचा खुलासा केला होता. दोघांमधील घटस्फोटाची प्रक्रिया सुरु आहे तसेच, मुलाच्या कस्टडीबाबत देखील वाद असल्याचे तपासातून समोर आले होते. त्या अनुषंगाने पतीची चौकशी होण्याची शक्यता आहे.

दरम्यान, शुक्रवारी कळंगुट पोलिसांनी सूचना सेठला घटनास्थळी घेऊन जात क्राईम सीन रिक्रिएट केला. सूचनाने यावेळी त्या दोन दिवसांत घडलेल्या घटनांचा घटनाक्रम सांगितला. कात्रीच्या मदतीने तिने हाताची नस देखील कापल्याचे कबुल केले. मात्र, सूचनाने मुलाचा खून केला नसल्याचे सांगितले.